"Мандухай сэцэн хатан" уран сайхны киноны Батмөнх даян хаан,  "Мөнх тэнгэрийн хүчин дор" киноны Чилүгэний дүрээр монгол түмний сэтгэлд мөнхөрсөн Монгол Улсын Гавъяат жүжигчин Жамсрангийн Сүххуяг бурхны оронд оджээ. 

Ж.Сүххуяг нь 1982 онд УБДС-ийн кино драмын ангийг Д.Маамхүү, Б.Мөнхдорж багшийн удирдлага дор жүжигчин мэргэжлийг эзэмшиж төгсжээ.

Тэрбээр 1993 онд "Хөдөлмөрийн гавьяаны улаан тугийн одон", 2009 онд гавъяат жүжигчин цол тэмдгээр шагнуулсан байна. Ж.Сүххуяг нь "Давааны цаана даваа",  "Үүрийн цолмон", "Ацаг шүдний зөрүү", "Мандухай сэцэн хатан", "Мөнх тэнгэрийн хүчин дор",  "Учиртай гурван толгой" зэрэг дэлгэцийн олон бүтээлд дүрээ мөнхөлжээ.