Сүүлийн жилүүдэд хиймэл оюун ухаан хүмүүсийн амьдралд чимээгүйхэн нэвтэрч, томоохон өөрчлөлтийг бий болгож байна. 40 гаруй жил үргэлжилсэн мэдээллийн эрин үед хүн төрөлхтөн компьютерт юу хийхийг зааж байв.

Харин одоо хиймэл оюун ухаан автоматаар сайжрах компьютерын алгоритм (Machine learning) ашиглан юу хийхээ өөрөө олж мэдэж байгаа юм.

Тэр дундаа боловсролын салбарт хиймэл оюун ухааны ачаар сурагчдад дүн тавих, алдаа засахад хялбар болсон зэрэг дэвшлүүд гарч байна. AI багшийг орлох уу гэсэн асуулт байгаа ч орлохоос илүү чадварыг нь нэмэгдүүлнэ гэж мэргэжилтнүүд үзэж буй.

Хиймэл оюун ухааныг боловсролын салбарт чиглүүлэн хөгжүүлэхэд дэлхийн орнууд, ялангуяа Хятад хэдэн сая ам.долларын хөрөнгө оруулалтыг хийж байна. Энэ салбарын хөрөнгө оруулалтаар тус улс АНУ-г ардаа орхисон бөгөөд хиймэл оюун ухаанд суурилсан 1700 сургалтын төв байгуулахаар төлөвлөж байгаа аж.

Багш нар хиймэл оюун ухаант системийн ачаар оюутнуудын мэдлэгийн зөрүү, сул болон давуу талыг нь илүү сайн ойлгож түүнд нь тохирсон сургалтын хөтөлбөрийг боловсруулж байна.

Нөгөөтээгүүр суралцагчдад өөрийн хүсэл сонирхол, чадварт нийцсэн сургалтын хөтөлбөр, өөрт таарах арга барилтай багшаа сонгоход тусалдаг.

Мөн сургуулийн орчинд Google Home, Amazon Alexa, Apple Siri зэрэг програмуудыг ашиглаж байна. Тодруулбал эдгээрийг сургуулийн танхим, хонгил зэрэгт байрлуулж, сургагчид хичээлийн хуваарьтай холбоотой энгийн асуултаа асуудаг аж.

Боловсролын салбарт AI ашиглаж эхэлсэн жишээ:

• Third Space Learning. Энэхүү системийг Лондонгийн коллеж ашиглаж байгаа ба багш хичээл заах явцдаа хэт удаан эсвэл хурдан яривал дохио өгөх маягаар заах арга барилыг сайжруулдаг байна.
• Little Dragon. Энэ нь хэрэглэгчийн сэтгэл хөдлөлд дүгнэлт хийж харагдах байдлаа сольдог аппликейшн бөгөөд хүүхдийн сурах сонирхлыг төрүүлдэг байна.
• Cram101. Сурагчийн дижитал дэвтэрт анализ хийж нэмэлт мэдээллээр баяжуулах боломжтой систем.
• Carnegie Learning. Багшид суралцагчдын явцыг илтгэж, дүн шинжилгээ хийнэ.
• ThinkerMath. Тоглоомоор дамжуулан математикт суралцахад зориулсан уг аппликейшн хүүхдүүдийн мэдлэгээс хамаарч сургалтын төлөвлөгөөгөө өөрчилдөг.

Ашиглаж болох AI бүхий зарим систем, програм, аппликейшнүүд:

1. Тоглоомоор дамжуулан суралцахад туслах Kidaptive, DreamBox, Osmo
2. Онлайнаар суралцахад туслах CTI, Coursera, Udacity, edX
3. Хэл сурахад туслах Duolingo, Babbel, Rosetta Stone, VIPKID
4. Зөв бичихэд туслах Chimege, Grammarly, Turnitin
5. Шалгалтын материал бэлдэхэд туслах Quizlet, Kaplan, Magoosh, Toppr
6. Анализ хийхэд туслах BrightBytes, Civitas Learning, Acrobatiq

Эх сурвалж: Medium, GettingSmart