АМГТХЭГ-ын Кадастрын албаны ахлах мэргэжилтэн Ч.Баттогтохын ахалсан баг Хан-Уул дүүргийн Биокомбинат, Шувуун фабрикийн ойролцоо элс, хайрга олборлогч карьеруудад шалгалт хийжээ.

Энэ бүс нутагт 40 гаруй компани барилгын зориулалтаар хайгуул, олборлолт хийх лицензтэй бөгөөд зөвшөөрөлгүй хэчнээн этгээд газрын хэвлий сэндийлж байгааг хэлэх аргагүй юм.

Хотын төвөөс 40 орчим километрийн зайтай энэ газар олон жилийн өмнө хатан Туулаас гадна хэд хэдэн гол, горхи урсдаг жинхэнэ хөдөө нутаг байжээ. Харин одоо тэр сайхан үеийнхтэй адил уул, ус энд байхгүй ч мал маллан амьдралаа залгуулдаг иргэд үлдсэн байна.

Замаас хоёр километр хүрэх үгүйтэй зайд ашигладаг эсэх нь тодорхойгүй сэндийлээд хаясан хэсэг газар байв. Хэн гэж этгээдийн ухаад хаясан хөрс болохыг тогтоож чадсангүй. Учир нь тэнд хариуцаж буй хүн байсангүй. Харин түүнээс километр орчмын зайд өмнөхөөс хавьгүй өргөн талбайг хамарсан нь "Очир ням" компанийн карьер гэнэ. Хайгуул, олборлолт хийх зөвшөөрлийн бичиг нь олборлолт явуулж байгаа карьер дээр нь байсангүй. Энэ карьерыг хариуцаж буй компанийн ажилтан Болд бидэнд энэ мэдээллийг хүргэсэн юм. Ашигласан хэсэгт хэрхэн нөхөн сэргээлт хийдэг талаар түүнээс лавлахад ухсан нүхээ шороогоор дүүргэж, дээрээс нь шувууны сангас, бас бус бордоо хаян зүлэг ногоо ургуулдаг гэв. Тэдэнд олборлолт хийх зөвшөөрлийг Хан-Уул дүүргийн Засаг дарга өгчээ. Товчхондоо энэ бүс нутаг хөрсөөрөө эргэсэн улаан түйрэн болсон байв. Шувуун фабрикаас хот руу ирэх замд элс, хайрга зөөдөг бололтой том оврын машины цуваа ер тасарсангүй. Эдгээр машинууд шөнөөр элс, хайрга их тээвэрлэдгээс гадна нийслэлтэй холбосон замыг маш ихээр эвдэлж байгааг нутгийн оршин суугчид ярьж байлаа.

Уг нь олборлолт хийх компаниуд лиценз авахдаа байгальд ямар нөхөн сэргээлт, яаж хийхээ эрх бүхий байгууллагад танилцуулдаг.

Г.Энх