УИХ-ын Төсвийн байнгын хорооны өчигдрийн хурлаар Монгол Улсын 2009-2011 оны төсвийн хүрээний мэдэгд­лийн тухай УИХ-ын тогтоолын төслийг хэлэлцлээ.

Засгийн газраас 2009-2011 оны дунд хугацааны зорилтод эрдэс түүхий эдийн томоохон ор­дуудыг ашиглах, макро эдийн засгийн тогтвортой байдлыг бататган хадгалах, инфляцийг нэг оронтой тоонд байлгах зэргийг зургаан үндсэн чиглэл болгон төсвийн хүрээний мэдэгдэлд тусгажээ. Ту­хайл­бал, Чойбалсан-Баруун-Урт болон Оюу толгой, Таван толгой-Сайншандын чиглэлд төмөр замын сүлжээг барьж байгуулах ажлыг хэрэг­жүү­лэх, Оюу толгойн алт, зэс, Таван толгойн нүүрс, Асгатын мөнгө, ураны зарим ордуудыг эдийн засгийн эргэлтэд оруулж, уул уурхайгаас орох орлогын хэмжээг нэмэг­дүү­лэх, “Эрдэнэт”-ийн зэсийн баяжмалыг боловсруулж, эцсийн бүтээгдэхүүн үйлд­вэрлэлийг дэмжиж, экспор­тын орлогыг нэмэгдүүлэх гэх мэт олон асуудлыг хэрэг­жүү­лэхээр төлөвлөжээ.

Мөн төсвийн орлогын ДНБ-д эзлэх хэмжээ 2008 онд 42, 2009 онд 37.3, 2010 онд 33.2, 2011 онд 32 хувь байх хандлагатай байна гэж улсын төсвийн байдлыг тодор­хойл­сон байна.

З.Энхболд, Н.Батбаяр нарын гишүүд “Төсвийн орло­го 1998 онтой харьцуулахад арав дахин өсчихөөд байгаа. Гэтэл Монголбанк хуучин арга барилаараа ажиллаад байна. Өөрөөр хэлбэл, шинэ нөхцөл байдалтай хуучин арга барил таарахгүй. Хэлэл­цүүлэхээр оруулж буй ма­териалаа тооцоотой, бодитой тоон дээр үндэс­лэсэн байх хэрэгтэй. Гаднаас хамааралтай хүнсний бү­тээгдэхүүний хэрэгцээг яаж хангах талаар гурван жилийн төсөвт тусгасан байх шаард­лагатай. Хүндрэлтэй байгаа асуудлуудыг бодитойгоор УИХ-д оруулж ирмээр байна. Өнөөдрийн инфляцийг ч тоо­цох шаардлагатай. Инфля­цийн өсөлтийн талаар Төс­вийн байнгын хороогоор ярих­гүй юм бол Монгол Улсад өөр хаана хэн ярих вэ” гэх зэр­гээр 2009-2011 оны төсвийн хүрээний мэдэгдлийг багагүй шүүмжиллээ. Санал хураалт явуулахад олонхи гишүүн 2009-2011 оны төсвийн хү­рээний мэдэгдлийг УИХ-аар хэлэлцэх нь зүйтэй гэж үзсэн юм.

Дараа нь Засгийн газрын тусгай сангийн тухай хуульд нэмэлт оруулах тухай, Мон­гол Улсыг хөгжүүлэх сангийн тухай хуульд нэмэлт оруулах тухай хуулийн төслийг хэ­лэлц­сэн юм. Эдгээр хуульд өөрчлөлт оруулснаар стра­тегийн чухал бүтээгдэхүүний нөөц бүрдүүлэлтэд уг сан­гуудаас есөн тэрбум төгрө­гийг зарцуулах аж. Төсвийн байнгын хорооны олонхи ги­шүүн нөөц бүрдүүлэлт хийх­дээ хямд байхад нь нөөцөлж саваа дүүргэж авах хэрэгтэй гэсэн саналыг хэлж байлаа. Ту­хайлбал, улсын нөөцөд хоёр сарын хэрэгцээг хан­гахад 120 мянган тн шата­хуун худалдан авах шаард­лагатай байгаа аж. Дээр хоёр хуульд нэмэлт оруулах тухай хуулийн төс­лийг гишүүд дэм­жиж, УИХ-аар хэлэлцэхээр боллоо.

Засгийн газарт эрх олгох тухай тогтоолын төслийг мөн тус байнгын хороогоор хэ­лэлцэв. Засгийн газраас им­портоор ирж ирэх элсэн чи­хэр, цагаан будаа, шар будаа, ургамлын тос, загас, тахиа, ногоон цай, гоймон, цөцгийн тос, улаан буудай зэрэг хүнс­ний бүтээгдэхүүний гаалийн татварыг таван хувиар буул­гах саналыг УИХ-д оруулжээ. Уг тогтоолын төсөл батлагд­санаар Засгийн газар 4.9 тэрбум төгрөгийн гаалийн татварыг зургаан сарын хуга­цаанд хөнгөлөх эрхтэй болох аж. Манай улс жилд 80-90 сая ам.долларын хүнсний бүтээг­дэхүүн импортолдог байна. Төсвийн байнгын хорооны гишүүд уг тогтоолын төслийг хэлэлцэх нь зүйтэй гэдэг дээр санал нэгдэв.

Д.Уран