УИХ-ын чуулганы нэгдсэн хуралдаан үргэлжилж байгаа ба дараах асуудлыг хэлэлцэж байна. 

• Төсвийн тогтвортой байдлын тухай хуульд нэмэлт оруулах тухай хуулийн төсөл 
• Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд 
• Замын хөдөлгөөний аюулгүй байдлын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд 
• Төсвийн тогтвортой байдлын тухай хуульд нэмэлт оруулах тухай хуулийн төсөл 
• Нийтийн өмчийн хууль /Шинэчилсэн найруулга/-ийн төсөл болон хамт өргөн мэдүүлсэн хууль, тогтоолын төслүүд 
• Эд хөрөнгийн эрхийн улсын бүртгэлийн тухай хуульд өөрчлөлт оруулах тухай хуулийн төсөл 
•  “Монгол Улс дахь хүний эрх, эрх чөлөөний байдлын талаарх 24 дэх илтгэл, эрүү шүүлтээс урьдчилан сэргийлэх асуудал эрхэлсэн гишүүний тайланг хэлэлцсэнтэй холбогдуулан авах зарим арга хэмжээний тухай” Улсын Их Хурлын тогтоолын төсөл
• “Төрийн үйлчилгээнд процессын дахин инженерчлэл хийх ажлыг эрчимжүүлэх талаар чиглэл өгөх тухай” Улсын Их Хурлын тогтоолын төсөл
• “Зээлийн хүүг бууруулах хүрээнд авах зарим арга хэмжээний тухай” Улсын Их Хурлын тогтоолын төсөл

“Монгол Улс дахь хүний эрх, эрх чөлөөний байдлын талаарх 24 дэх илтгэл, эрүү шүүлтээс урьдчилан сэргийлэх асуудал эрхэлсэн гишүүний тайланг хэлэлцсэнтэй холбогдуулан авах зарим арга хэмжээний тухай” Улсын Их Хурлын тогтоолын төслийг хэлэлцэж байна. 

УИХ-ын гишүүн Х.Баасанжаргал: 
Өмнөх жилүүдийн хүний эрхийн тогтоолын хэрэгжилтийн тайлан хэдэн хувьтай байдаг вэ. Хэрэгжилтийг би хувьдаа хангалтгүй гэж хардаг. Цаашид хэрэгжилтийг хангах үйл ажиллагааг хэрхэн төлөвлөж байна вэ? Энэ жилийн илтгэл хангалтгүй гарлаа гэж харж байна. Тогтоол гаргаснаар ямар арга хэмжээ авах ёстой гэж харж байна вэ?

ХЭҮК-ийн дарга Д.Сүнжид:
Өмнөх тогтоолууд хэрэгжилтүүд дүгнэж үзэхэд 19, 20 дахь тогтоол 71 хувь, 21 дэх нь 62 хувь, 22 дэх тогтоол 60 хувь, 23 дахь тогтоол буюу ирэх жилийнх нь  51 хувьтай байна. 

Дээрхэд хэдэн шалтгаан бий. Хууль  эрх зүйн зохицуулалтыг хийх ёстой гэсэн зарим заалтыг хэрэгжүүлээгүй. Хэвлэлийн эрх чөлөөний тухай, жагсаал цуглааны тухай хууль, эрүүдэн шүүх гэмт хэргийг мөрдөн шалгах нэгж байгуулах заалтыг  хэрэгжүүлээгүй.  

Хоёрдугаарт төрийн байгууллагуудын уялдаа холбоо байдгаас сул байдгаас болж хэрэгжилт хангалтгүй байдаг. Гуравдугаарт төсөвтэй холбоотой буюу үе шаттай хэрэгжүүлэх ажлуудад төсөв хөрөнгө оруулалт шийдэгдэхгүй уддаг нь хэрэгжилт хангалтгүй байдалд хүрдэг. Тэгэхээр цаашид дээрхийг шийдвэрлэж байж хэрэгжилт үр дүнтэй гарна. 

“Зээлийн хүүг бууруулах хүрээнд авах зарим арга хэмжээний тухай” Улсын Их Хурлын тогтоолын төслийг хэлэлцэж байна. 

УИХ-ын гишүүн Ц.Идэрбат: 
Зээлийн хүүг бууруулах асуудал нь олон жил л яригдаж байна. Бизнес эрхлэх, нийгмийн харилцаанд асуудал болдог. Зээлийн эх үүсвэрийн асуудал нь зээлийн хүү буурахын үндэс шалтгаан болдог гэх мэт хүчин зүйлс бий. Зээлийн хүү бууруулах шат дараалсан арга хэмжээнүүдийн талаар УИХ-д хэлэлцэхэд тэтгэврийн зээлийн эргэн төлөлт нь найдвартай тул хүүг бууруулах хамгийн боломжтой нь гэж Монголбанкныхан ярьдаг ч түүнээс хойш 3-4 сар болж байна. Заавал тогтоол гаргахгүйгээр зээлийг бууруулах алхам та бүгд хийв үү. Мөнгөний бодлогын хороо, Ерөнхий сайдын түвшинд ярьж байж зээл шуурхай олгогдож эхэлсэн ч эргээд нөгөө зээлийн хүү өсөж байгаа. Та бүхэн танхимд гишүүдийн ам дагуулдаг хэр нь ямар ч үйлдэл гаргадаггүйг чинь хараад гайхаад байна. 

УИХ-ын гишүүн А.Ариунзаяа:
Санхүүгийн зах зээл нь банк, хөрөнгийн зах зээл, даатгалын зах зээл гэсэн гурван тулгууртай байдаг. Манайд банкны салбар нь үүний 85-90 хувийг эзэлж, 8 хувийг хөрөнгийн зах зээл, үлдсэн 2 хувийг даатгал эзэлдэг. Зээлийн хүү гэхээр л бид банканд хамаатуулаад байдаг. Жил бүр мөнгөний бодлого, төсөв, төсвийн бодлогыг УИХ-ын чуулганаар хэлэлцдэг. Дэлхийн орнуудад мөнгөний бодлогыг их хурлаараа хэлэлцдэг нь бараг байхгүй дээ. Санхүүгийн зохицуулах хорооны хариуцах ажилд ач холбогдол өгөхгүй байна.

Иргэдийн өдөр тутмын амьдралд нөлөөлж байгаа ломбард, банк бус санхүүгийн газар, жижиг зээлүүд нь СЗХ-ны эрхлэх асуудалд орчихдог. Тэгэхээр зээлийн хүүг бууруулахад банк гэхээсээ илүү СЗХ-нд хамаатай гэж бодож байна. Мөн гадаадын банк Монголд оруулж ирэх талаар олон жил ярьж байна. Банкууд хөрөнгө, санхүүгийн зах зээлээ үгүйсгээд, даатгал, аялал жуулчлалын салбар гээд байж болох бүх салбар руу орж байна. Үүнийг хуулийн зохицуулалтаар хумимаар байгаа юм. Мөн гаднын банкуудыг оруулж ирмээр байна.