АНУ-ын Ерөнхийлөгч Доналд Трамп ОХУ-д гал зогсоох 50 хоногийн хугацаа өгсөн. Хэрэв ОХУ заасан хугацаанд хэлэлцээрт хүрэхгүй бол гаалийн татвараа өсгөнө гэв. 

Энэ удаад ОХУ-тай гадаад худалдаа эрхэлдэг улсуудын гаалийн татварыг нэмэх болжээ. Өөрөөр хэлбэл ОХУ-аас байгалийн хий, газрын тос авдаг улсууд Америкт бараагаа экспортлох бол гаалийн татвар нь 100 хувь болно. Тэгэхээр энэ шийдвэр Монголд ч хамаарна. 

АНУ энэ шийдвэрээрээ ОХУ-аас түүхий эд авдаг улсуудын худалдааг онилов. Мөн ОХУ-ын хамгийн гол орлогын эх үүсвэр болох байгалийн хий, газрын тосны орлогыг бууруулахаар зорьжээ. Гэвч энэ нь тийм ч амар биш. Хэдийгээр АНУ, Европын холбоо ОХУ-тай хийдэг худалдаагаа бууруулсан ч Африк, Латин Америкийн орнууд хойд хөрштэй худалдаа хийсээр байна. 
  
Эдгээр улс сонголт хийх шаардлагатай боллоо. Нэг бол ОХУ-аас түүхий эд авах эсвэл Америкт бараагаа худалдах. Ялангуяа ОХУ-ын худалдааны томоохон түншүүд Хятад, Энэтхэг, Турк хүнд сонголттой нүүр туллаа гэж ВВС мэдээлэв.

ОХУ-аас хамгийн их бараа худалдан авдаг таван улс: БНХАУ, Энэтхэг, Турк, Казахстан, Бразил 
ОХУ-д хамгийн их бараа нийлүүлдэг таван улс: БНХАУ, Турк, ХБНГУ, Казахстан, Итали

Энэ оны эхний хагас жилд манай улс АНУ руу 76 сая ам.долларын бараа экспортолсон гэж Гаалийн байгууллага мэдээлсэн юм. Экспортын гол бүтээгдэхүүнд цамц, хантааз болон бусад оёмол бүтээгдэхүүн, аяны хөнжил, хүнсний бүтээгдэхүүн, гянт болдын хүдэр, баяжмал багтдаг байна.