О.Эрдэнэ-Очир урлагийн гэр бүлээс гаралтай. Тэрээр МУСТА бүжигчин Д.Нарантуяагийн хүү юм. Эрх зүйч мэргэжилтэй ч бүжигчний замнал хөөсөн түүнд хүн бүр л мэргэжлээрээ ажиллаач мөнгө олно, бүжгээр чи хоолоо олохгүй гэж хатуухан үгс чулуудсан аж. Гэсэн ч тэрээр хоббигоо орхилгүй харин ч улам хөгжүүлж, дэлхийн аварга шалгаруулах тэмцээнд зургаан удаа амжилттай оролцож, бүжгийн спортын олон улсын хэмжээний мастер болтлоо зүтгэсэн юм.

Royal dance клубын үүсгэн байгуулагч, ерөнхий дасгалжуулагч, Dance chance ТББ-ын тэргүүн Очирхүүгийн Эрдэнэ-Очиртой цахим сүлжээнд түгээсэн “Шарка барка, Журай гэлдэн” чалленжийнх нь талаар ярилцав.

-Шарка барка, Журай гэлдэн  чалленж эхлүүлэхэд юу нөлөөлөв?
-Цахим орчинд хүнд хэрэгцээгүй, ашиг тус багатай, бүр муухай зүйлийг хийлгэдэг чалленжууд байдаг. Залуучууд түүнийг нь даган дуурайж байсан нь надад их нөлөөлсөн. Тухайлбал, гоймон идэх, хөөнд толгойгоо дүрэх, шаварт шумбах, хөмсгөө хусах гэх мэт.

Биднийг даган дуурайдаг залуус, дүү нартаа хэрэгтэй, ашигтай чалленж эхлүүлье гэж бодсон. Бид бүжигчид учраас бүжгийн чалленж хийе гэж шийдсэн. Тэр тусмаа монгол бүжгээ бүжиглэж, монгол бүжгийн гайхамшгийг олонд түгээхийг зорьсон юм. Манай чалленжийн гол онцлог нь өөр өөр угсаатан ястны бүжгийг бүжиглэх. Дээрээс нь КОВИД19-той холбоотойгоор дотоодод аялал жуулчлал ч нэмэгдсэн тул аялахдаа байгальдаа хог хаягдал үлдээлгүй аялахыг уриалж байна.

Бид бүжгээр дамжуулж нийгэмд соёлын довтолгоо эхлүүлсэн. Манай “Dance chance” ТББ нийгэмд эерэг хандлагыг түгээж, зөв зүйлд уриалах зорилготой. Үүндээ ч хүрч байна. Мөн бүжигчний үнэлэмжийг дээшлүүлэх, бүжгийн спортыг сурталчлах зорилго давхар агуулсан.

-Олон үндэстэн угсаатан дундаас яагаад халимаг түмний бүжгээр эхэлсэн бэ?
-Контент маань богинохон дээрээс нь хүнийг уйдаахааргүй, сонирхлыг нь татсан байх шаардлагатай. Халимаг түмний бүжгийн аяыг сонссон хүн шууд л бүжиглэмээр санагдахаар, хөнгөн хэмнэлтэй, цоглог аятай болохоор эхний чалленжаа халимаг түмний Шарка барка дуун дээр хийсэн юм.

Дараагийнх нь Монголчууд бүгдээрээ мэддэг “Журай гэлдэн” бөгөөд дан монгол биелгээ, хотон бүжиг бүжиглэсэн. Гурав дахь чалленжээ “Хатариш”-аар хийсэн. Монголд буриад зон олон шүү дээ. Иймд буриад бүжиг Ёохорыг бүжиглэсэн юм.

Хотон ардын дуу “Журай гэлдэн”-д Жуураа хэмээх уран гоё бүжиглэдэг эмэгтэйн тухай өгүүлдэг байна. Гэлдэн гэдэг нь гэлцэнэ гэсэн утгатай. Энэ дуунд баруун монгол ардын дунд дэлгэрсэн “Икэл”, “хуур”, “товшуур”  хэмээх хос чавхдаст нумаар шөргөөн дуу гаргах болон товшин савардах хөгжмийн зэмсгийн талаар ч дүрслэн өгүүлдэг байна.

-Чалленжийн бүжгээ өөрсдөө дэглэдэг үү. Бүжигтээ зөвхөн тухайн үндэстний хөдөлгөөнийг хийсэн үү?
-Ер нь бол туйлшраагүй. Заавал халимаг түмний дуун дээр халимаг бүжгийн хөдөлгөөн хийнэ гэсэн юм байхгүй. Гэхдээ тухайн үндэстэн угсаатны хэв маягийг харуулсан хэд хэдэн хөдөлгөөнийг оруулсан. Гол нь чалленж учраас хүмүүс дагаж хийж болохуйц, хялбар хөдөлгөөнийг судлаад дэглэсэн. Бүжгээ н.Халиун багштайгаа хамт дэглэсэн.

-Хоёр ч  чалленжийн ард гарчихлаа. Олон нийтээс ямар хариу үйлдэл ирж байна?
-Манай контентэд нэг ч сөрөг сэтгэгдэл ирээгүй. Энэ нь манай чалленжийн үнэлэлт, дүгнэлт гэж бид ойлгож байна. Урьд нь манай Монголчууд бүх юмыг шүүмжилж, өөг нь хардаг. Бидний манай бичлэгийн доор дандаа амжилт хүссэн, эерэг сэтгэгдэл үлдээж биднийг дэмжсэнд маш их талархаж байна. Мөн дэлхийд таран суурьшсан монголчууд биднийг дэмжиж байгаад баярлаж байна. Гадаадаас бас бүжиг заалгах урилга ирсэн.

-Хоггүй аялцгаая бүжгийн чалленжийн 5 дугаар гарна гэсэн. Дараагийн чалленжээ ямар үндэстний бүжгээр хийх вэ?
-Чалленжийнхээ бүжгийг бодсон. Гэхдээ нууц хэвээр нь үлдээе. Нэг бэлэг задлахад дараагийн чалленжээсээ зочин урьж эхэлнэ. Удахгүй чалленжийн бүжгээ төв талбайд үнэгүй зааж эхэлнэ.

-Ярилцсанд баярлалаа. Цаашдын ажилд тань амжилт хүсье.

М.Ариунзаяа