Номын хорхойтнууддаа зориулан Интерном дэлгүүрт борлуулалтаараа тэргүүлсэн номуудыг танилцуулдаг уламжлалтай.

Ширээний дараагийн номоо хараахан сонгоогүй бол өнгөрөгч долоо хоног тодруулбал, тавдугаар сарын 4-нөөс тавдугаар сарын 10-ны хооронд хэний ямар бүтээл борлуулалтаараа тэргүүлснийг дараах мэдээллээс сонирхоорой.

1.Өглөөний хүн: Цаг хугацааг захирах нь – С.Хироши

Цаг хугацааны боол байсан эмгэнэлт хувь тавилангаас ангижирч, амьдралаа жолоодогч "Өглөөний хүн" болох 100 өдрийн хувьсгал, ядарч туйлдсан амьдралын дүр төрхийг хэмжээлшгүй их эрч хүчээр дүүргэх гайхамшигт өглөөний хүч чадал, мэрийх хэдий ч зорьсондоо хүрч чаддаггүй хүмүүст зориулсан өглөөний тусгай төлөвлөгөө, өнгөрсөн 20 жилийн турш япончуудыг өглөөний амьдралын хэмнэлд оруулж өөрчилж ирсэн агуу бүтээл энэ жагсаалтад оржээ.

2.Хайрлах урлаг – Э.Фромм

Эрих Фромм хайрыг зүгээр нэг гэнэт учирдаг тэгээд л өөрөө цааш яваад өгдөг мэдээжийн үйл явдал биш гэдгийг анхааруулж, хайранд зөв сайн суралцаж чадвал хүнийг хайрлах болохоос биш, суралцаагүй хүний хайрыг жинхэнэ хайр биш гээд үүнийгээ олон жишээ болон онол дээр тулгуурлан батлан харуулсан байна. Энэ ном гарсан цагаасаа хойш 60 гаруй жилийн дотор олон сая хэвлэгдэж, бараг 40-өөд орны хэл дээр орчуулагдаж байжээ.

3.Би өөрөө №173: 2-3 нас, 4-6 нас

3-6 насны хүүхдийн танин мэдэхүйг хөгжүүлэхэд зориулсан сар тутмын сэтгүүлд бичих, зурах, будах, цаасаар урлах, ялгааг олох, таах, нэрлэх даалгаврууд байхаас гадна монгол ёс зан заншлыг таниулах танин мэдэхүйн ач холбогдол бүхий эх, дуу, шүлэг, үлгэр бүгд багтжээ.

4.Чонон сүлд – З.Рун

Энэ номонд эгэл жирийн амьдралын өгүүлэмж, хүн байгалийн хүйн холбоо, амьтан хайрлах ухаан, байгалийн нөөцийг зүй зохистой ашиглах монгол ухаан, малчин хүн чоно хэмээх араатныг агнаж авлахын зэрэгцээ, хэрхэн найзалж нөхөрлөж чаддаг тухай, энэ амьтныг бишрэн шүтэж сүлдлэн дээдэлж, зэрэгцэн оршиж амьдардаг тал нутгийнхны өдөр тутмын хэмнэлт амьдрал, амьдрах арга ухааныг дүрслэн гаргажээ.

5.Өөдөө тэмүүл – Ш.Сандберг

Ш.Сандберг энэхүү номондоо эмэгтэйчүүдийн удирдах албан тушаалд хүрэх зам яагаад мухардсан талаар гүнзгий судлан бичиж, өөрийгөө бүрэн дайчлах замаар энэ байдлаас хэрхэн гарч болохыг үзүүлээд, эмэгтэйчүүдийг хүсэл тэмүүлэлтэй, манлайлах амбицтай байхад уриалан дууджээ.

6.Сорхугтани – Б.Сарантуяа

Энэ роман их эзэн Чингис хааны үеэс Мөнх хааны үе хүртэлх хагас зуун жилийн хугацаа, Монголын нууц товчоо бичигдэж дууссан цагаас хойших түүхийн балархай эх сурвалжуудыг хөвөрдөж, уран зохиолын хэлнээ буулган, эзэнт гүрний мандал бадрал, уналт босолтын он жилүүдийг Сорхугтани хатны түүхэн амьдралтай холбон харуулжээ.

7.Очир эрхшээгч – Б.Батрэгзэдмаа

Энэхүү роман эгэл жирийн нэгэн англи хүмүүн монгол гэгээнтэнтэй учирснаар урьд насандаа эгэлгүй хүчийг олсон лам хувраг хүмүүн явснаа мэдэж улмаар үйлийн үрийн гүн гүнзгий утга, мөнх ба мөнх бусын амьдралыг танин мэдэж, дэлхий ертөнцийн ил далдын гайхалтай явдал, дээд оршихуйн чанадын гайхамшигтай нууцад нэвтрэн, гэгээрлийн хутагийг олж буй тухай өгүүлнэ.

8.Монголын сонгомол өгүүллэг – Г.Аюурзана, Л.Өлзийтөгс

Номын зохиогчид 1920 оноос эдүгээ хүртэлх өгүүллэг бүрийг эргэн харахыг хичээж, өөрсдийн уншсан хэмжээнд чухам сайныг нь шилж, хүүрнэл зохиолыг боломжийн хэрээр төлөөлж чадахуйц бүтээлүүдийг оруулахыг зорьсон байна. Уг номонд Д. Нацагдоржийн Харанхуй хад, Ламбугайн нулимс, Хөдөө талын үзэсгэлэн, С. Эрдэнийн Хулан бид хоёр, Малын хөлийн тоос, Өвгөн шувуу, Наран тогоруу, С. Дашдооровын Бууж мордох хорвоо, Б. Догмидын Босоо ороолон, П. Батхуягийн Хүрэл зүрх, Б. Золбаярын Бүтэн зэрэг нийт 50 шахам бүтээлүүд багтсан байна.

9.Гэм зэм – Ф.Достоевский

Ф.Достоевскийн "Гэм зэм" романыг дэлхий нийт уран зохиолын хан оргилуудын нэг гэдэг. Нутагтаа төдийлөн алдаршаагүй ч барууны ертөнцөд шагшигдан Оростоо хүндлэгдэх болсон Ф.Достоевскийн бүтээлүүд ямагт ёс суртахууны сэдэвтэй байдаг. Түүний хувьд ёс суртахууны шалгуур нь Христийн тэр дундаа Үнэн алдартны шашин билээ. Гэхдээ "Гэм зэм" романы Раскольников нүгэл буян сүлэлдсэн энэ хорвоогийн жирийн хүний нэг. Хувь хүний өөртөө сонгон авсан идеаль нийт олонтой, нийгэмтэйгээ зөрчилдөх нь тэрслэл билээ. Харин тэрслэгч мөнөөх үзэл санааныхаа энд хүрэхгүй бол нийгмийн тэрхүү өчүүхэн хэсэг “орших, эс орших”-ын тухай асуултанд хариулах болно.

10.Бид амьд хүмүүс – А.Рэнд

Айн Рэндийн философи ерөнхийдөө XX зууны эхэн үе дэх оросын түүхэн үйл явдлын нөлөөн дор бүрэлдэн төлөвшжээ. Түүний анхны бүтээл нь "Бид амьд хүмүүс" роман юм. Уг зохиолд 1920-иод оны ЗСБНХУ-д тохиосон эмгэнэлт үйл явдлуудын тухай гарна. Тэрээр Петроград-Ленинград хотын ахуй амьдралын адармаат үйл явдлуудаар дамжуулан Оросын түүхийн цөвүүн цагийн талаар зохиолын баатруудаа өчүүхэн ч өмгөөлж хамгаалахгүйгээр бичжээ. Мөн бусдад гэм хор учруулалгүйгээр хэрхэн бүтээлч амьдарч болох тухай, үзэл бодолдоо үнэнч үлдэж, аливаа асуудалд өөрийн толгойгоор хандаж, хувь хүний өөрийн гэх орон зайтай байхын чухлыг ч бас энд өгүүлнэ.