Хөвсгөл аймгийн нутаг дахь Могойн голын нүүрсний уурхайг түшиглэн дулааны цахилгаан станц барихаар тууз хайчилсан нь ердөө сарын өмнөхөн билээ. Хятадын хөрөнгө оруулалттай "Шинэ Азиа Майнинг"-ийг сайн мэдэхгүй ч амтай бүхэн магтсан тэр нүсэр пиар үр дүнгээ эсрэгээр өгөв бололтой.

Засгийн газрын хуралдаанаар бушуухан хэлэлцүүлээд баталъя хэмээн яаравчилсан лобби бүлэг УИХ дахь АН-ын бүлгийн гишүүдэд нэг л сэжигтэй санагдаж, улмаар чуулганаар уг асуудлыг хэлэлцэхэд ярсхийтэл гар өргөн гэрээг дахин нягтлахаар болж буцаах шийдвэр гарав.

Эдүгээ Хөвсгөл аймагт "Могойн гол"-ын нүүрсний уурхай байгаагүй, түүнд түшиглэж ДЦС барих гээгүй мэт нам гүм болжээ. Тэр ч байтугай баруун бүсийг цахилгаанаар хангахын төлөө юу ч хийхээс буцахгүй мэтээр саймширч байсан Хятадын хөрөнгө оруулагчид ч дахин ганц үг ганхийсэнгүй.

Энэ бүхэн сэжигтэй биш гэж үү. "Могойн гол"-ын ДЦС-ыг барих ажлыг дэмжих үүрэг хүлээн туузанд хайч хүргэсэн улстөрчид хаачив.