Яамдын харьяа сангуудыг шалгах ажлыг Сангийн яам хариуцан үргэлжлүүлж байна.

Тариалан эрхлэлтийг дэмжих сангийн улсын төсөвт буцааж төлөх ёстой, хугацаа хэтэрсэн өр 132 тэрбум төгрөгт хүрчээ. Асуудлыг энэ сард багтааж Засгийн газрын хуралдаанд оруулна гэдгийг Сангийн сайд Ч.Хүрэлбаатар өчигдөр мэдээлсэн юм. Тариалан эрхлэлтийг дэмжих сангийн даргаар В.Үнэнбат ажилладаг юм.   

ЖДҮХС болон Тариалан эрхлэлтийг дэмжих сангуудын үйл ажиллагааг Засгийн газрын тусгай сангийн тухай хуулиар зохицуулдаг. Одоогоор манай улсад Засгийн газрын 29 тусгай сан бий. Эдгээрийн 11-ийг нь жил бүр улсын төсвийн хөрөнгөөр санхүүжүүлдэг юм.

Хөнгөлөлттэй болон нэн хөнгөлөлттэй зээл, татаас, урамшуулал олгодог сангууд:    

• ЖДҮХС
• Тариалан эрхлэлтийг дэмжих сан
• Мал хамгаалах сан
• Хөдөлмөр эрхлэлтийг дэмжих сан
• Боловсролын зээлийн сан.

Жил бүрийн улсын төсвийн тухай хуулийг батлахдаа дээрх сангуудад орлого хуваарилдаг. Хөндлөнгийн хяналтыг Үндэсний аудитын газар, холбогдох яамны Дотоод хяналт шалгалтын газраас тус тус хийсээр ирсэн юм.

Харин Нийгмийн даатгалын сан, Нийгмийн халамжийн сан, Эрүүл мэндийн даатгалын сан тусдаа хуультай.

Улсын төсвөөс санхүүждэггүй, өөрийн хөрөнгөөр санхүүждэг сангууд:

• Зэвсэгт хүчний хөгжлийн сан
• Авто замын сан (Төлбөр хураах цэгүүдээс орлогоо бүрдүүлдэг.)

Засгийн газрын өрийн баталгааны сан, Үйлдвэрлэл хөгжүүлэх сангууд огт үйл ажиллагаа явуулдаггүй аж.  

Энэ онд Сангийн яамнаас бүх сангийн үйл ажиллагааг нарийвчлан шалган, шаардлагатай бол зарим санг татан буулгах юм байна.