УИХ-ын гишүүн Ц.Туваан, Б.Бейсен нар "ЭМД-ын сангаас сум болон өрхийн эрүүл мэндийн төвд олгох суурь санхүүжилт хоёр дахин өссөн,  мөн хүнсний тухай хуулийн хэрэгжилтэд хяналт шалгалт хийж, дүгнэлт гаргах ажлын хэсэг байгуулсан" талаар мэдээлж байна.

ЭМД-ын сангаас сум болон өрхийн эмнэлэгт олгох санхүүжилтийг хоёр дахин буюу 87 тэрбумаар өсгөсөн. 2020 оны наймдугаар сард Эрүүл мэндийн багц хуульд нэмэлт өөрчлөлт орж, төр төлбөрийг нь хариуцах тусламж үйлчилгээнүүдийг ЭМД-ын сангаар дамжуулан худалдан авах эрх зүйн орчин бүрдсэн ба хууль хэрэгжилт ирэх 2022 оны нэгдүгээр сарын 1-нээс эхлэхээр болсон.

ЭМД-ын сангаас нэг иргэнд олгох үйлчилгээний дээд хязгаар 2 сая төгрөг байсан бол хязгааргүй болсон мөн хөнгөлөлттэй эмийн жорыг бүх шатны эмч бичдэг, бүх эмийн сангаар олгогддог болсон.

ЭМД-ын сангаас 2021 оны эхний есөн сарын байдлаар ЭМ-ын байгууллагад олгох тусламж үйлчилгээнд 634,9 тэрбум, эмийн хөнгөлөлтөд 44 тэрбум, Элэг бүтэн монгол хөтөлбөрт 3 тэрбум, ковидын тусламж үйлчилгээнд 204 тэрбум нийт 886,8 тэрбум төгрөгийн гүйцэтгэлийн санхүүжилт олгожээ. Үүнээс улсын эмнэлэгт 356 тэрбум, хувийн эмнэлэгт 64,6 тэрбум, сувилалд 8,2 тэрбум, сумын эмнэлгүүдэд 4,4 тэрбум, өрхийн эмнэлэгт 3,1 тэрбум төгрөгийг гүйцэтгэлээр санхүүжилт олгосон.

УИХ-ын гишүүн Ц.Туваан:

-Нэг иргэнд Эрүүл мэндийн даатгалын сангаас олгодог эмнэлгийн тусламж үйлчилгээний төлбөр 2 сая төгрөгөөр хязгаарлагдаад зогсдог байсныг цуцалсан. Өөрөөр хэлбэл иргэн хүнд өвчтэй бол Эрүүл мэндийн даатгалын сангаас хязгааргүйгээр эрүүл мэндийн тусламж үйлчилгээг авч болно.

Шинэ хууль сум өрхийн эмнэлгүүдэд маш хангалтгүй хэрэгжиж ирсэн. Хөдөө, орон нутагт хэрэгжиж байгаагүй гэж хэлэхэд болно. Үүнийг хяналт, шалгалтын ажлын хэсэг тогтоогоод хуулийн хэрэгжилтийг хангуулах талаар дүгнэлтээ гаргасан байгаа.

Мөн сумын болон өрхийн эрүүл мэндийн буюу анхан шатны эмнэлгийн байгууллагуудад нэг иргэнээр тооцдог санхүүжилтийг хоёр дахин өсгөсөн маш чухал шийдвэр гарсан.

УИХ-ын гишүүн Б.Бейсен:

-Анхан шатны эмнэлгүүд төсвөөс санхүүжилт авахын ач холбогдол нь ард иргэдэд үзүүлэх тусламж, үйлчилгээ сайжирна. Учир нь төсөв хүрэлцээгүйн улмаас сум, өрхийн эмнэлгүүд шинжилгээ хийж чадахгүй, эм тасалдах зэрэг шалтгаанаар иргэдэд гүйцэд тусламж үзүүлж чадахгүй байгаа.

Төсвийг хоёр дахин нэмэгдүүлснээр тусламж, үйлчилгээг анхан шатанд нь үзүүлэх боломж бүрдлээ. Төсөв хүрэлцээгүйн улмаас нэгдсэн эмнэлэгт ачаалал нэмэгддэг байсан бол одоо өрхийн эмнэлэг, суманд шинжилгээ хийх, ажилчдынхаа цалинг нэмэгдүүлэх бүрэн боломжтой боллоо.