-Энэ бол бэлгийн мөлжлөгийн эсрэг олон улсын компанит ажлын уриа юм-

Гадаад хүнтэй гэрлээд, гэрийн хорионд зодуур дор амьдарч буй, өндөр цалинтай ажилд орохоор яваад бичиг баримтгүй, буцах боломжгүй болон биеэ үнэлж, эцэст нь амиа алдсан гээд олон аймшигтай хэргийн тухай мэдээлэл байдаг.

Тэгвэл, олон улсын түвшинд хамгийн их орлоготой хэргийн тоонд,
-Хар тамхины наймаа,
-Хүн худалдаалах гэмт хэрэг,
-Зэвсгийн наймаа ордог байна.

Хүн худалдаалах гэмт хэргийн илрүүлэлт бага байдаг учраас энэ төрлийн гэмт хэрэг өсөн нэмэгдсээр байгаа аж.

Өөрөөр хэлбэл эрсдэл багатай, ашиг өндөртэй учраас энэ төрлийн гэмт хэрэг газар авсаар байна.

“Хүн худалдаалах гэдэг нь аливаа залилан, хүч хэрэглэн хүнийг зөөх, тээвэрлэх, хулгайлах, өөрийн эрх мэдэл, бусдын дорой байдлыг ашиглан, хүнийг аливаа мөлжлөгт ашиглахыг хэлнэ. Мөлжлөг гэдэгт хүчээр биеийг нь үнэлүүлэх, бэлгийн мөлжлөг, хөдөлмөрийн мөлжлөг, боолчлол болон эд эрхтнийг нь авах орно” гэжээ.

Манай улс 2008 оны зургадугаар сарын 27-нд НҮБ-ын Хүн худалдаалах гэмт  хэрэгтэй тэмцэх протоколд нэгдсэн юм.

Гадаадад, өндөр цалинтай ажилд зуучлах нэрээр биеийг нь үнэлүүлэх, цалин хөлсгүй ажиллуулах, захиалгат гэрлэлтийн хэргүүд манай улсад өндөр байна.

2001 онд хүн худалдаалах 1 гэмт хэрэг гарсан бол 2008 онд 300 болон өсчээ.

Хүн худалдаалах гэмт хэргийн золиос нь ихэвчлэн амьдралын боломжгүй, араас нь хөөцөлдөх хамаатан садангүй хүмүүс байдаг.

Тиймээс Хүний аюулгүй байдлын судалгааны төв, Каритас Чех олон улсын байгууллага, Монгол Улсын хүний эрхийн үндэсний комиссоос хамтран энэ чиглэлээр сургалт зохион байгуулж байна.

Өнөөдөр сэтгүүлчдэд энэ төрлийн хэргийн талаар мэдээлэл өгсөн бол маргааш иргэний нийгмийн байгууллагуудад, лхагва гаригт хууль сахиулах байгууллагын ажилчдад сургалт явуулах юм.

Сургалтыг олон улсын мэргэжилтэн Петер Уилсон зааж байгаа юм. Тэрээр английн цагдаагаар ажиллаж байгаад тэтгэвэрт гарч, улмаар энэ чиглэлээр дагнан ажиллаж байгаа аж.

Хүн худалдаалах гэмт хэрэг тэр дундаа бэлгийн мөлжлөгийн гол шалтгаан нь эрэгтэй хүн байдаг талаар тэрээр онцолсон. Учир нь тэд эрэлт үүсгэж байгаа учраас нийлүүлэлт байх нь мэдээж гэнэ. Гэвч одоогийн байдлаар энэ төрлийн хэрэг илэрсэн ч эрэлт үүсгэж буй, эмэгтэйчүүдийг худалдан авч буй эрчүүдэд хуулийн хариуцлага хүлээлгэх боломжгүй байдаг нь харамсалтай.

Ахин сануулахад жинхэнэ эр хүн эмэгтэйчүүдийг хэзээ ч худалдаж авдаггүй.