Израилын талаас Палестинийг дэмжигч идэвхтнүүд болон хүмүүнлэгийн тусламж ачиж яваа хөлгийг Газын зурваст хүргэхгүй байхын тулд "шаардлагатай бүхий л арга хэмжээг авна" хэмээн анхаарууллаа.

Тодруулбал "Мадлен" дарвуулт хөлөг Газын зурвасаас 300 орчим км-ын зайд ирээд байгаа ба Израилын тавьсан далайн бүсийн хоригийг зөрчин Газын зурваст хүрэхээр зорьж байгаа юм.

Энэ хөлөгт уур амьсгалын өөрчлөлтийн эсрэг тэмцэгч Грета Тунберг болон Бразил, Франц, Герман, Нидерланд, Испани, Швед, Турк зэрэг олон орны иргэд багтсан.

Тэд Газын зурвасын иргэдэд шаардлагатай хүнс, хүүхдийн нэмэлт тэжээл зэргийг авч яваа аж. 
Харин Израилын Батлан хамгаалахын сайд "Грета болон түүний хамсаатнуудад хандаж хэлье. Та нар буцах хэрэгтэй. Та нар Газын зурваст хүрч чадахгүй. 

Далайн бүслэлтийг зөрчих, террорист байгууллагуудад туслах аливаа оролдлогын эсрэг тэнгис, агаар, хуурай газар гээд бүх хэлбэрээр арга хэмжээ авна" хэмээн анхааруулжээ. 

2010 онд Израилын командууд Газа руу хүмүүнлэгийн тусламж хүргэж байсан Туркийн "Мави Мармара" хөлөг онгоц руу довтолж,10 хүний амийг хөнөөж байв. 

Эх сурвалж: ВВС