Багшлах эрхийн гэрчилгээ олгох, гэрээт багшийн талаар Боловсролын сайд П.Наранбаяр болон холбогдох албаныхан мэдээлэл өглөө. Тодруулбал багшлах эрхийн гэрчилгээ олгох журмыг баталсныг Боловсролын яам энэ сарын 13-ны өдөр танилцуулав.

Салбарын сайд, Гэрээт багш ажиллуулах журам гарсантай холбоотой тодруулга мэдээлэл хүргэе гэж бодлоо. Нэгдүгээрт энэ журам нь багшийн дутагдал, хомсдолыг нөхөх зорилготой. Өнөөдөр 4200 орчим багшийн сул орон тоо байна. Үүнээс Байгалийн ухаан болон Англи хэл хамгийн өндөр байгаа юм.

Бид зүгээр нэг гудамжинд байгаа хүнийг 45 хоногийн курсээр сургана гэсэн зүйл огт биш. Дээр дурдсан хичээлүүд буюу хими, физик, биологи, технологи, англи хэл, математик гэсэн мэргэжлээр гадаад, дотоодын их дээд сургуулийг 2.7 буюу 80 хувиас дээш үнэлгээтэй төгссөн хүмүүсийг багшаар ажиллаач гэж урьж байгаа.

Зөвхөн Монгол биш дэлхийн улс орнууд хорин жил тутам ийм хомсдолд ордог.

Үүнийг богино хугацаанд хурдтай шийдвэрлэх хэрэгтэй байна. Энэ бол эцэг, эхэд ээлтэй шийдвэр. Хоёр жилийн турш химийн багшгүй явж байгаа сургуулиуд ч байна.

Бид үндсэн багшийн үнэмлэх олгож буй асуудал ерөөсөө биш. Зөвхөн багшлах эрхийг олгож байгаа. Тухайн хүн цаашдаа 4-5 жил багшлаад үндсэн багш болъё гэвэл тусгай шаардлага тавьж эхэлнэ.

Судалгаа хийдэг, монголоос гадна гадаад хэлээр эх сурвалжаа олоод хичээлдээ ашиглаж чаддаг хүмүүст бид зах зээлийг нээмээр байна. Түүнчлэн энэ журам багш нарын ачааллыг бууруулах ач холбогдолтой. Физикийн багш нар хомс байгаа учраас нэг багш маш олон ангид хичээл зааж байна. Ингээд ирэхээр тухайн багшид хичээлийн бэлтгэл хүртэл хэцүү болно. Багшийн ачаалал буурч байж, чанар гэдэг зүйл гарч ирнэ гэсэн юм.

Гэрээт багш нар 45 хоногийн танхимын сургалтаа дуусгасны дараа дадлагажих сургалтад мөн хамрагдана гэдгийг хурлын үеэр онцолсон.