Ерөнхий сайд Л.Оюун-Эрдэнийн мэдээлэл түгээх үйл ажиллагаа болон сүүлийн үед үүсээд буй асуудалтай холбоотойгоор хараат бус, бие даасан редакцууд нэгдэж, энэ оны тавдугаар сарын 20-нд Засгийн газрын хэрэг эрхлэх газарт шаардлага хүргүүлсэн.

Шаардлагад Монгол Улсын Ерөнхий сайд Л.Оюун-Эрдэнэ тогтмол хугацаанд ямар нэг эвлүүлэггүй, олон нийтэд нээлттэй, шууд ярилцлага өгдөг байх, энэхүү үйл ажиллагааг албажуулах зорилгоор “Ерөнхий сайдын мэдээлэл өгөх журам”-ыг боловсруулж, хэрэгжүүлэх тухай тусгасан юм.

Тэгвэл албан бичигт дурдсан хугацаа өнөөдрөөр дуусгавар болно.

Иймээс гүйцэтгэх засаглалыг 5 жил удирдсан Ерөнхий сайдын хувиар ХМХ-ээр дамжуулан ил тод, нээлттэй мэдээлэл өгөхийг дахин шаардаж байна.

Мэдээллийг хязгаарлан, мэдээллийн урсгалыг цөөн ХМХ-д мэдээллээ өгдөг ялгаварласан байж болзошгүй үйлдлүүдийг цааш даамжруулахгүйн тулд нээлттэй засаглахыг бид уриалсан билээ.

Иймээс ардчилсан улсад Засгийн газрын тэргүүн ХМХ-ээр дамжуулан олон нийтэд хандан мэдээллээ цаг тухайд нь хүргэдэг, нээлттэй ажилладаг зарчмын шаардлагыг хүлээн авч  ЗГХЭГ-т хүргүүлсэн албан бичигт даруй хариу өгөхийг шаардлага хүргүүлсэн хэвлэл мэдээллийн байгууллагууд сануулж байна.