Хэрвээ температур халуун болох аваас мөс хайлдаг. Угаас мөсний хайлах температур 0 градус байдаг учраас аяганд байгаа дөрвөлжин мөс байна уу, Өмнөд туйлын мөс байна уу, ялгаагүй.
 
Science Advances сэтгүүлд гарсан шинэ нийтлэлд бичсэнээр хүн төрөлхтөн одоо байгаа бүх шатах түлшийг ашиглаж дуусах юм бол, өмнөд туйлын мөс хайлж, далайн түвшин 60 метрээр нэмэгдэнэ гэжээ. Энэ нь дэлхийн томоохон хотууд усанд автана гэсэн үг юм.

Харин тэдний хүүхэд, тэдний хүүхдийн хүүхдэд хамаатай

Шатах түлш буюу нүүрс, газрын тос, байгалийн хий зэрэг нь сэргээгдэхгүй эрчим хүчний эх үүсвэр. Энэ төрлийн эх үүсвэрүүд шатсаны дараа нүүрсхүчлийн давхар исэл ялгаруулж, хүлэмжийн хийг нэмэгдүүлдэг гэмтэй.
 
Хүлэмжийн хий нарны илчийг хадгалж, температурыг нэмэгдүүлнэ. Нийтлэлийг бичсэн, цаг уур судлаач Кен Калдейра “Бидний тооцоолсноор хэрвээ өмнөд туйлыг хайлуулмааргүй байвал газраас ухаж гаргаж ирж байгаа шатах түлшийг ашиглахаа болих хэрэгтэй” гэжээ.

 
Далайн түвшин 60 метрээр өсөхөд ойролцоогоор 4000-20000 жил орчим хугацаа шаардлагатай гэсэн тооцоо бий. Гэхдээ хүн төрөлхтний хэрэгцээ, шаардлага өссөөр энэ хугацаа богиноссоор л байгаа.
 
НАСА-ийн тооцоолж буйгаар ирэх зуун жилийн хугацаанд далайн түвшин нэг метрээр нэмэгдэх аж. Би байхгүй юм чинь гэдэг сэтгэхүйгээр боддог бол энэ тоо танд ч, бүр таны хүүхдэд ч хамаагүй. Харин тэдний хүүхэд, тэдний хүүхдийн хүүхдэд хамаатай.
 
Мэдээж хэрэг үүнээс сэргийлэх боломж бий. Жишээлбэл нүүрс, газрын тосны оронд нар, салхины эрчим хүчний хэрэглээг нэмэгдүүлэх, бүр урт хугацааны хор уршгийг нь бүрэн устгаж чаддаг болсон тохиолдолд цөмийн эрчим хүчийг хэрэглэх хэрэгтэй.

Эх сурвалж: PopSci