Батлан хамгаалах их сургуулийн харъяа “Тэмүүжин өрлөг” цэргийн бүрэн дунд сургуулийн сурагчдын эцэг эх, захирал асан хурандаа С.Наранцогт нар сэтгүүлчдэд хандлаа.

Тэд уг сургуулийг үүсгэн байгуулагч генерал З.Болдбаатар, түүний дүү Р.Энх-Амгалан нарыг сургуулийн мөнгийг хувьдаа завшсан хэргээр АТГ-т шалгуулахаар өгчээ. Энэ талаар хурандаа С.Наранцогтоос тодрууллаа.

-”Тэмүүжин өрлөг” батлан хамгаалах бодлогын хүрээнд байгуулагдсан цэрэгжсэн анхны сургууль. Гэвч тус сургуулийн хүүхдүүд цэргийн сургалтаар огт хичээллэхгүй байна гэх юм?
-Уг сургуулийг гурван жилийн өмнө байгуулахдаа тусгай сургалттай байна гэж зөвшөөрөл авсан. Гэтэл З.Болдбаатар өөрийн дураар ердийн сургалттай болгож өөрчилсөн. Эцэг эхчүүд хүүхдээ цэргийн сургуульд орууллаа гэж боддог. Харамсалтай нь тэнд цэргийн эрхзүйн тухай нэг ч хичээл орохгүй байна. Яг ерөнхий боловсролын сургуультай адил. Тэгэхээр энэ бол хууль бус явдал.

-Тус сургуулийг байгуулан их хэмжээний мөнгө завшсан хэрэгт З.Болдбаатар, Р.Энх-амгалан гэх хүмүүс холбоотой гэж үзэж байгаа юм уу?
-Сургууль байгуулахад дүрмийн сан гэж зайлшгүй байх ёстой. Зөвшөөрлөө батлуулахдаа дүрмийн санд 84794680 төгрөг бий гэж батлуулсан байдаг. Би тус сургуулийн захирлын албыг хаших гурван жилийн хугацаанд энэ мөнгийг хэрхэн захиран зарцуулсан тухай нэг ч баримт харж байгаагүй. Санхүүгийн асуудал хаалттай байсан. Тэд нийлж сургуулийг хувийн ашиг сонирхолдоо нийцүүлэн ажиллаж байна гэж баримтанд тулгуурлан сэжиглэж байгаа. Р.ЭнхАмгалан бол З.Болдбаатарын эхнэрийн дүү. Сургууль анх байгуулагдахад түүнийг менежерээр томилсон юм. Харин би “Тэмүүжин-Өрлөг” сургуулийн захирлын хувьд түүнийг ажлын шаардлага хангаагүй, ёс зүйн хэд, хэдэн зөрчил гаргасан шалтгаанаар саяхан чөлөөлсөн. Гэтэл хэд хоногийн дараа намайг ажлаас халах тушаал гарсан.

Г.Туяа