Эрүүл мэндийн яамнаас МХЕГ-тай хамтран Эрүүл ахуй, халдвар судлалын тулгамдсан зарим асуудлыг тодорхойлох, шийдвэрлэх, боддого боловсруулахад салбар дундын үүрэг оролцоо, уялдаа, хамтын ажиллагааг сайжруулах зорилгоор Улаанбаатар хотноо "Эрүүл ахуйч, халдвар судлаачдын үндэсний анхдугаар зөвлөгөөн"-ийг гурав хоног амжилттай зохион байгуулж, өндөрлөлөө.

Энэхүү зөвлөгөөнд ЭМЯ, ДЭМБ, НЭМГ, ЭМГ, ХӨСҮТ, БГХӨСҮТ, НЭМХ, НЭМС-ийн мэргэжилтэн, судлаач, багш нар, МХЕГ, НМХГ-ьш эрүүл ахуй, халдвар судлалын хяналтын улсын байцаагч, аймгийн МХГ-ын эрүүл ахуй, халдвар судлалын хяналтын улсын байцаагч болон ЭМГ-ын орчны эрүүл мэндийн мэргэжилтэн, эмнэлгийн халдвар судлаач, ТББ-ын төлөөлөл зэрэг нийт 216 хүн оролцсон юм.

Эхний өдрийн нэгдсэн хуралдаанд Эрүүл мэндийн сайд С.Ламбаа "Нийгмийн эрүүл мэндийн талаар төрөөс баримталж буй боддогын хэрэгжилт, үр дүн, цаашдын чиглэл" сэдвээр, Мэргэжлийн хяналтын ерөнхий газрын дарга Р.Содхүү "Эрүүл ахуй, халдвар судлалын хяналтын бодлого, үр дүн, цаашдын чиглэл" сэдвээр илтгэл тавьсан юм.

Түүнчлэн орчин, хөдөлмөрийн эрүүл ахуй, халдвар судлал, хүүхэд, өсвөр үеийн эрүүл ахуй, хүнсний эрүүл ахуй гэсэн гурван үндсэн чиглэлээр салбар хуралдаануудыг зохион байгуулсан. Зөвлөгөөний хаалтын нэгдсэн хуралдааны үеэр эрүүл ахуй, халдвар судлалын албанд олон жил үр бүтээлтэй ажилласан, нийгмийн эрүүл мэндийн салбарыг хөгжүүлэх, бэхжүүлэхэд оруулсан хувь нэмрийг нь өндрөөр үнэлж, Эрүүл мэндийн сайд С.Ламбаа 12 хүнд "Эрүүлийг хамгаалахын тэргүүний ажилтан", найман хүнийг ЭМЯ-ны "Жуух бичиг"-ээр шагнасныг гардууллаа.

Мөн МХЕГ-ын "Жуух бичиг"-гээр зургаан хүн, "Эрүүл мэндийн салбарын 90 жилийн ойн медаль"-иар 35 хүн тус тус шагнагдсан. Зөвлөгөөний хаалтын нэгдсэн хуралдаанаар нийт 216 төлөөлөгчөөс 12 заалт бүхий зөвлөмжийг гаргаж, Засгийн газрын гишүүн, Монгол Улсын шадар сайд С.Энхболдод хүргүүлэхээр шийдвэрлэсэн байна.