Иргэн З.Б нь Хараагүй хүмүүсийн хөдөлмөр сургалт үйлдвэрлэлийн сургалтын үйлдвэр ТӨААТҮГазрын захирал төсвийн шууд захирагчаар ажиллаж байжээ. Энэ хугацаандаа төсвийн болон хандив тусламжийн мөнгийг зориулалтын бусаар зарцуулсан үүний улмаас их хэмжээний хохирол учруулсан.

Төслийн санхүүжилтээс  61 гаруй сая төгрөгийг зориулалтын бусаар зарцуулсан буюу төсөл эхлэхээс өмнө үүссэн байгууллагын өр төлбөрийн асуудлыг төслийн мөнгөөр барагдуулах ажлыг зохион байгуулсан гэмт хэргийг үйлдсэн. Харин тус үйлдэлд нягтлан Б.О хамжигчаар оролцсон гэмт хэргийг тус тус үйлдсэнд буруутган прокуророос яллах дүгнэлт үйлдэж шүүхэд ирүүлжээ.

Шүүгдэгч З.Б, Б.О нар шүүхэд гаргасан тайлбартаа:

“Эдийн засгийн нөхцөл байдал хямралын улмаас бараа материалаа зээлээр аваад бүтээгдэхүүнээ үйлдвэрлээд борлуулалтын орлогоороо ажилчдынхаа цалинг тавьдаг байсан. Хараагүй хүмүүс нь манай төвөөс өөр үйлдвэр, байгууллагад ажиллах боломжгүй, хараагүй хүний хөдөлмөр эрхлэх хийж чадах ажил нь хязгаартай байдаг, үйлдвэрлэсэн бүтээгдэхүүн нь зах зээлд борлогдох боломж бага байдаг. 

Төслийн мөнгийг өөртөө амин хувьдаа зарцуулсан зүйл байхгүй, байгууллагын наад захын шаардлагатай байгаа зардалд нийт 61 гаруй сая төгрөгийг зарцуулсан гэжээ. 

Ингэж явсаар нийгмийн даатгал, татварын газарт өртэй болсон. Цалингаа тавьж чадахгүйн улмаас ажилчдын амьдрал ахуй хэцүү байдалд орсон, манай байгууллагад гэр бүлээрээ ажилладаг хүмүүс ч байдаг, нийгмийн даатгалд өртэй болохоор цалингийн зээл гарах боломжгүй байдал бий болсон. 2019 онд хөдөлмөр эрхлэлтийн үндэсний зөвлөлийн тогтоолоор батлагдсан хараагүйчүүдийн үйлдвэрлэлийн үйл ажиллагааг сайжруулах техник технологийг шинэчилж үйлдвэрлэлийг нэмэгдүүлэх зорилгоор 249 сая төгрөгийн төсөл боловсруулсан, төслийн хүрээнд холбогдох техник хэрэгслийг 187 сая төгрөгөөр авсан, хэвийн ажиллаж байгаа.

Төслийн мөнгийг өөртөө амин хувьдаа зарцуулсан зүйл байхгүй, байгууллагын наад захын шаардлагатай байгаа зардал болох 2019 оны 5 сараас 27-ны өдрөөс мөн оны 12 сарын 31-ний өдөр хүртэл хугацааны ажилчдын цалинд 16 сая төгрөг, хүн амын орлогын албан татварт 10 сая, нийгмийн даатгалын шимтгэлд 34 сая төгрөг нийт 61 гаруй сая төгрөгийг зарцуулсан” гэжээ.

Анхан шатны шүүхээс хэрэгт авагдсан нотлох баримтаас харахад 61 гаруй сая төгрөгийг ажилчдын цалин, нийгмийн даатгалын шимтгэл,  татварт зарцуулсан үйл баримт тогтоогдож байна. Гэхдээ энэ тогтоогдож байгаа үйл баримтыг  албан тушаалын гэмт хэрэг гэж үзэхгүй. Өөрөөр хэлбэл тухайн байгууллагын ажилчдын цалин нийгмийн даатгалын шимтгэл, татварын өр төлбөрийг дарах зорилготой шилжүүлсэн байна, хохирол хор уршиг учруулсан гэж үзэхгүй гэж дүгнэсэн байна. Иймд З.Б, Б.О нарт холбогдох хэргийг гэмт хэргийн шинжгүй үндэслэлээр хэрэгсэхгүй болгож шүүгдэгч нарыг цагаатгаж шийдвэрлэв.

Эх сурвалж: Баянгол, Хан-Уул, Сонгинохайрхан дүүргийн эрүүгийн хэргийн анхан шатны тойргийн шүүх