Засгийн газраас 2026 оны Төсвийн тухай хуулийн төслийн танилцуулгыг хийж, ирэх оны төсөвт иргэдийн саналыг хүлээн авах нээлттэй хэлэлцүүлгийг олон нийтийн дунд явуулж байна.

2026 оны төсвийн төсөлд Монгол Улсын 2026 оны нэгдсэн төсвийн тэнцвэржүүлсэн орлогын хэмжээг 31.6 их наяд төгрөг буюу ДНБ-ий 30.9 хувь, нийт зарлагын хэмжээг 33.0 их наяд төгрөг буюу 32.2 хувь, төсвийн суурь тэнцлийг 2.0 их наяд төгрөг буюу ДНБ-ий 2.0 хувьтай тэнцэх ашигтай байхаар төлөвлөжээ.

Засгийн газар ирэх онд нийгмийн хамгааллын хөтөлбөрүүдийн хүртээмжийг сайжруулах бодлого барих ба энэ хүрээнд нийгмийн даатгалын болон нийгмийн халамжийн тэтгэврийн хэмжээг 6 хувиар нэмэгдүүлнэ. Үүнд 378.4 тэрбум төгрөг зарцуулахаар төсөлд тусгасан байна.

Мөн нийгмийн даатгалын болон халамжийн тогтолцооноос тэтгэвэр, тэтгэмж авах хүний тооны өсөлт, хүүхдийн мөнгөн тэтгэмжид хамрагдах хүүхдийн тооны өсөлт, түүнчлэн хөдөлмөрийн чадвар түр алдалт, ажилгүйдэл, оршуулгын тэтгэмжийн өсөлттэй уялдаж нэмэгдэх зардлын нөлөөллийг төсөвт тусгажээ.

Цалин, тэтгэвэр, тэтгэмжийн хэмжээг инфляцын түвшинд уялдуулан нэмэх эрх зүйн зохицуулалт 2025 оны төсвийн жилээс хэрэгжиж эхэлсэн бөгөөд энэ бодлогын хүрээнд мөн 6 хувиар нэмсэн юм.