Бээжин хотноо дэлхийн анхны хүн дүрст роботын наадам энэ сарын 14-нд эхэлж гурван өдрийн турш үргэлжилж буй. 

Тэмцээнд 16 орны 280 багийн 500 гаруй робот хөлбөмбөг, боксоос эхлээд эм тан ялгах, цэвэрлэгээ хийх зэрэг 26 төрлөөр өрсөлдөж байна. Энэхүү наадам нь хиймэл оюун ухаанаар ажилладаг робот хөгжүүлэх Хятадын бодлогын нэг хэсэг юм.

Олон улсын роботын холбоо (IFR)-ын баримт бичигт:

“Хятад улс хүн дүрст роботыг үндэсний стратегийнхээ төвд болгосон. Засгийн газар энэ салбарт өөрийн чадавх, дэлхийн өрсөлдөх чадвараа харуулахыг хүсэж байна” гэж тэмдэглэжээ.

Энэ оны гуравдугаар сард Хятад улс робот болон хиймэл оюун ухааны стартапуудыг дэмжих зорилгоор нэг их наяд юанийн хөрөнгө оруулалтын сан байгуулахаа зарласан.

2022 оны Өвлийн олимпийн наадамд зориулж барьсан Бээжингийн “Үндэсний хурдны тэшүүрийн ордон”-д болж буй наадмын тасалбарын үнэ 180- 580 юанийн  хооронд байна.

Сүүлийн саруудад Хятад улс роботын олон үйл ажиллагаа зохион байгуулсан. Үүнд дэлхийн анхны хүн дүрст роботын марафон, роботын бага хурал, хүн дүрст роботын дэлгүүрийн нээлт зэрэг багтжээ.

Гүйлтийн тэмцээний хамгийн хурдан робот 1500 метрийг 6 цаг 29 минут 37 секундэд туулсан байна.

Эх сурвалж: DW