Malaysia Airlines агаарын тээврийн компанийн 239 хүн тээвэрлэж явсан, “Боинг” онгоцтой холбоо тасарсан гэж мэдэгдлээ. Куала-Лумпур-Бээжин чиглэлийн онгоц зургаан цагийн турш радио холбоонд хариу өгөхгүй байгаа гэнэ.

Онгоцонд Хятад, Малайз, Индонез, Австрали, Украин, Шинэ Зеланд, Канад, ОХУ, Франц, АНУ, Итали, Тайвань, Нидерланд, Австри зэрэг 14 орны 227 зорчигч, багийн 12 гишүүн байсан гэнэ.

Нисэх онгоц орон нутгийн цагаар 00.41 үед Куала-Лумпураас хөөрчээ. Харин хоёр цагийн дараа онгоцны холбоо тасарсан байна.

Синьхуа агентлагийн мэдээлж буйгаар нисэх онгоц Вьетнам улсын нутаг дэвсгэрт байхад холбоо тасарчээ.

Тус онгоц Бээжинд орон нутгийн цагаар 6.30-д газардах ёстой байсан. Гэвч БНХАУ-ын агаарын орон зайд нэвтрээгүй гэж Синьхуа мэдээлж байна.

Дашрамд хэлэхэд Malaysia Airlines нь Малайз болон Ази тивийн хамгийн том агаарын тээврийн компани бөгөөд өдөрт 80 чиглэлд 37 мянга зорчигч тээвэрлэдэг байна.