Европ тивийн баруун өмнөд хэсэгт гарсан ойн түймрийн улмаас олон мянган хүнийг нүүлгэн шилжүүлэхээс өөр аргагүйд хүрчээ.

Өнгөрсөн долоо хоногоос эхлэн олон мянган га талбайг хамарч хэд хэдэн хүний аминд хүрсэн ойн түймэртэй Франц, Испани, Португал, Грекийн гал сөнөөгчид тэмцэж байна.

Ойн түймэр нь зуны их халалтын хоёр дахь давлагаанаас үүдсэн бөгөөд уур амьсгалын өөрчлөлт халалтын хэмжээ, давтамжийг нэмэгдүүлж байна гэж эрдэмтэд үзжээ.

Зөвхөн Франц улсад 1200 гал сөнөөгч таван онгоцтойгоор ажиллаж байгаа ба гал сөнөөх 96 ангийн 38-д нь галын улбар шар дохио ассан байна.

Тус улсын өмнөд хэсэгт агаарын хэм Цельсийн 40 градус давсан бөгөөд хөрш Испанид 45.7 градус хүрсэн тохиолдол гарчээ. Хэт халууны улмаас Испанид 360, Португалд 238 хүн нас барсан талаар эрүүл мэндийн байгууллагууд нь мэдээлэв.

Мөн Италийн нутаг дахь Альпын нурууны мөсөн гол хайлж 11 хүн амиа алджээ.