Монголбанканд Азийн хөгжлийн банкны санхүүжилтээр “Төлбөрийн системийн шинэчлэл” төсөл хэрэгжсэн юм.

Энэ  хүрээнд үндэсний төлбөрийн системийн дэд бүтэц ялангуяа банк хоорондын төлбөр тооцоо, төлбөрийн картын программ, техник хангамжийг хөгжүүлж олон улсын жишигт хүрчээ. Ингэснээр дэлхийн томоохон банк, санхүүгийн байгууллагын төлбөрийн системтэй санхүүгийн, санхүүгийн бус гүйлгээ саадгүй дамжуулах боломж, нөхцөл бүрдсэн байна.

Төв банк Төлбөрийн системийн шинэчлэлийг амжилттай нэвтрүүлснээр үндэсний брэнд төгрөгийн картыг хилийн чанадад бусад төлбөрийн картын сүлжээнд хүлээн авах гарцыг бий болгохоор ажиллаж ирсэн.

Үндэсний брэнд ₮ картыг Солонгос Улсад, БиСи картыг Монгол Улсад харилцан төлбөрт хүлээн авах боломж бий болоход нэг алхам ойртлоо.

Монголбанк, БНСУ-ын КТ Группийн охин компани болох “BC Card (БиСи карт)” байгууллага хооронд Харилцан ойлголцлын санамж бичгийг өнгөрсөн сарын 13-нд байгуулжээ.

Санамж бичгийг байгуулснаар манай улсын төлбөрийн картын зах зээл тэлэх, иргэд дотоодын төгрөгийн картаараа олон улсад гүйлгээ хийх, хөгжлийн дараагийн шатанд шилжих чухал алхам болсон аж.

Хамтын ажиллагааны энэ хүрээнд Монголбанкны Төлбөр тооцооны газрын захирал Э.Анар, БиСи карт байгууллагын Ерөнхийлөгч Вон Сок Чой нар “Хамтран ажиллах гэрээ”-д өнөөдөр гарын үсэг зурж, баталгаажууллаа.

Тус гэрээг байгуулснаар Үндэсний брэнд ₮ картыг Солонгос Улсад, БиСи картыг Монгол Улсад харилцан төлбөрт хүлээн авах боломж бий болоход нэг алхам ойртлоо. Нэг талаас хоёр орны хамтын ажиллагааг сайжруулахын зэрэгцээ бизнес, хөдөлмөр эрхлэгч, аялал зуучлалаар хоёр улсад зорчих иргэд дотооддоо ашигладаг картаараа төлбөр тооцоогоо түргэн, шуурхай, найдвартай гүйцэтгэх нөхцөл бүрдэнэ. Нөгөө талаас ямар нэгэн хууль, эрх зүйн орчны хязгаарлалтгүйгээр санхүүгийн үйлчилгээ авах ач холбогдолтой юм. Энэхүү хамтын ажиллагааг амжилттай гүйцэтгэснээр, БиСи карт байгууллагын 3.2 сая ширхэг мерчант байгууллагаас үйлчилгээ авахдаа дотоодын ₮ картаар төлбөр төлөх боломжтой болно.

БиСи карт байгууллагын хувьд БНСУ-ын харилцаа холбооны томоохон операторын нэг болох КТ Группийн охин  компани бөгөөд 1983 онд үүсгэн байгуулагдсан. Тус улсын төлбөрийн картын үйлчилгээ эрхлэгч анхны компаниудын нэг юм. Одоогийн байдлаар 30 сая орчим карт гаргаж, жилд 5 тэрбум гүйлгээг дамжуулж байгаа нь Ази-Номхон далайн бүс дэх хамгийн том карт хүлээн авагч болж байна.

Монголбанк нь Үндэсний брэнд ₮ картыг үндэсний мөнгөн тэмдэгт төгрөгийг бэлэгдэн нэрлэж, банкуудтай хамтран гаргах ажлыг 2012 онд зохион байгуулсан. 2022 оны байдлаар 2.4 сая ширхэг ₮ карт ашиглагдаж байна.Энэ нь нийт картын зах зээлийн 55 хувийг дангаараа эзэлж байна хэмээн Төв банкнаас мэдээлэв.