Баянгол дүүргийн ИТХ-ын төлөөлөгч П.Өлзийнаран хотын дарга Д.Сумъяабазар нь Баянгол дүүргийн засаг даргыг үндэслэлгүйгээр огцруулсныг эсэргүүцэж Тусгаар тогтнол ордны гадаа суулт зарлалаа.

Тэрээр “Өчигдөр хотын дарга Д.Сумяабазар нь Баянгол дүүргийн засаг даргыг огцруулсан. Хоёр өдрийн өмнө Баянгол дүүргийн ИТХ-ын төлөөлөгчид хуралдсан. Тэр өдөр Ардчилсан нам, МАН-ын зарим ИТХ-ын төлөөлөгчид тус засаг даргыг огцруулах хүсэлт гаргасан байв. Тус хуралд ирсэн төлөөлөгчид уг хүсэлтийг судалж хуулийн дагуу хурлын хороод шийдье гэсэн юм. Гэтэл судлуулахгүй, хугацаа байхгүй гээд тухайн хуралд хэлэлцэхийг шахсан.

Тэнд байсан хэсэг төлөөлөгчид энэ асуудлыг хурлын хороод ажиллуулан, дүгнэлт гаргаж шийдье гэтэл цөөнхөөрөө ярилцаад шийдчихсэн. Энэ нь хууль зөрчөөд байна.

Баянзүрх дүүрэгт ч гэсэн ийм үйл явдал болж байгаа. Тэнд бол хуулиа мөрдөөд явсан. Гэтэл нийслэл хотын дарга чинь нийслэлийн намын хорооны дарга шүү дээ. Энэ хүнийг хууль, намын дүрмийн дагуу ажиллах байх гэсэн чинь урд шөнө хулгайч нохой шиг шийдвэр гаргачихсан. Монгол Улсын засаг захиргаа, нутаг дэвсгэрийн нэгжийн тухай хуулийн долоо, найман заалт зөрчиж байна.

Тухайлбал нийт төлөөлөгчийн олонх нь буюу 21-ээс дээш төлөөлөгч хуралд оролцож, огцруулахыг дэмжсэн санал өгч байж хүчинтэй тооцогддог. Харин хоёр өдрийн өмнөх хурал дээр 18 төлөөлөгч л зөвшөөрсөн бусад нь энэ асуудалтай танилцаж, гүтгэлгийн шинж чанартай асуудалд хөнгөн хандахгүй хуулиараа шийдье гэсэн юм.

Ялангуяа засаг даргатай холбоотой асуудлыг 15 хоногийн хугацаанд судлах ёстой байдаг. Ямар ч судалгаагүйгээр гэнэт л шийдвэр гаргаж болохгүй. Тиймээс нийслэлийн даргыг хууль, дүрмээ мөрдөж, шударга ёсыг баримталж ажиллаасай гэж суулт зарлаж байна.

Баянгол дүүргийн засаг дарга Ө.Сумъяабаатарыг огцруулах хүсэлтийн утга нь ямар ч үндэслэлгүй. Жишээ нь 1000 машины зогсоолыг хүнсний ногоо худалдаачдад төлбөртэй түрээсэлсэн гэж байгаа юм. Гэтэл тэр хүмүүсээс нэг ч төгрөг аваагүй. Харин ногоо худалдаачид маш их хог гаргаж байсан тул өөрсдөө зохион байгуулалттай хогийн мөнгө хураан ачуулсан л явдал байсан.
Өнөөдөр би ямар нэгэн даргын чиглэл аваагүй, иргэнийхээ хувьд хуулийн дагуу ажил явагдах ёстой гэж шаардаж байна. Тухайн засаг даргыг огцруулчхаад Сонгинохайрхан дүүргээс Баянгол дүүрэгт төлөөлөгч болсон н.Ихбаяр гэж хүнийг дэвшүүлнэ гэж яригдаад байгаа. Гэтэл н.Ихбаяр нь нэг ч удаа ИТХ-д ирдэггүй. Намын залуучуудын холбооны хурал дээр шал согтуу агсан тавиад явж байдаг хүн. Ийм хүнийг би Баянгол дүүргийн засаг дарга болгоно гэвэл хүлээн зөвшөөрөхгүй, эцсээ хүртэл тэмцэнэ” гэв.

Баянгол дүүргийн ИТХ нийт 41 гишүүнтэй юм. Мөн  Ө.Сумъяабаатар нь 2020 онд Баянгол дүүргийн засаг даргаар сонгогдож байжээ.