Сүхбаатар дүүргийн эрүүгийн хэргийн анхан шатны шүүхэд иргэн Д.Мөнх-Эрдэнэ нарын таван хүнд холбогдох эрүүгийн хэргийн шүүх хурал энэ сарын 4-нд эхэлсэн. Шүүх хурал өнөөдөр гурав дахь өдрөө үргэлжилнэ.

Хэргийн оролцогчид мэдүүлэг өгч дууссан. Одоо нотлох баримт шинжлэн судлах үйл явц, гэм буруугийн дүгнэлтээр үргэлжилж байна.

Д.Мөнх-Эрдэнэ нарт прокурорын байгууллагаас дараах дөрвөн зүйл ангиар яллах дүгнэлт үйлдсэн.

Шүүгдэгч Н.Мөнх-Эрдэнийн үйлдлийн улмаас улсад 112 сая төгрөгийг хохирол учирсан. Үүнээс 82 сая төгрөгийг гаргуулж, улсын төсөвт олгохоор шийдвэрлэсэн байна. Мөн гэмт хэрэг үйлдэж олсон орлого болох 10 сая төгрөгийг Н.Мөнх-Эрдэнээс, мөн 20 сая төгрөгийг Д.Эрдэнэбаярын ногдох хөрөнгөөс гаргуулж улсын орлого болгохоор шүүгч тус тус шийдвэрлэлээ. Шүүх хуралдаан үргэлжилж байна.

Консул асан Д.Мөнх-Эрдэнэ нь:

• БНХАУ-ын Хөх хот дахь Ерөнхий Консулоор ажиллах хугацаандаа БНХАУ-ын иргэнтэй түрээсийн гэрээ байгуулж, байрны түрээст 93 сая төгрөг төсөвт өртгөөс гаргуулсан,
• Хөх хот дахь Хянган замын тусгай дунд сургуулиас сургалтын төлбөр аваагүй байхад өөрийн хүүхдийн сургалтын төлбөрт 15 сая төгрөг төлсөн мэтээр хуурамч баримт бүрдүүлж, төсвийн хөрөнгөөс гаргуулж өөрийн эхнэрт олгосон,
• Дипломат төлөөлөгчийн газрын албан хэрэгцээнд ашиглаж байсан "Соната-7”, “Старекс” загварын автомашиныг шинэчилсэн бүртгэлд хамруулах нэрийдлээр БНХАУ-ын иргэнийг техникийн туслах ажилтнаар авч, 1 төгрөгийн цалин олгосон,
• Монгол Улсаас хилийн чанадад суугаа Дипломат төлөөлөгчийн газрын ажилтнуудад замын зардал олгохдоо Дэд Консул Б.Батзоригт 738 мянган төгрөг, атташе Д.Бямбаад 300 мянган төгрөг, эхнэр Д.Баянжаргал болон өөртөө 551 мянган төгрөг илүү олгож, төсөвт хохирол учруулсан,
• Илт худал мэдээллийг олон нийтэд тараасан,
• Хууль сахиулагчийг албан үүрэгтэй нь холбогдуулан хүч хэрэглэж эсэргүүцсэн,
• "Евро сервис" ХХК-ийн захирал Б.Ганбаяртай бүлэглэж, газар ашиглах хугацаа сунгасан гэрчилгээ гаргаж бусдад давуу байдал бий болгосон. Ингэхдээ УИХ-ын Тамгын газрын Хэвлэл мэдээлэл, олон нийттэй харилцах хэлтсийн даргаар ажиллаж байсан Б.Эрдэнэбаярт албан тушаалтай нь холбогдуулан 20 сая төгрөг хахуульд өгсөн.

"Евро сервис" ХХК-ийн захирал Б.Ганбаяр нь:

• Өөртөө давуу байдал бий болгох зорилгоор Д.Мөнх-Эрдэнэтэй бүлэглэн Богдхан уулын Дархан цаазат тусгай хамгаалалттай газарт байрлах Залаатын аман дахь 0.35 га газрын гэрчилгээг сунгуулах зорилгоор УИХ-ын Тамгын газрын Хэвлэл мэдээлэл, олон нийттэй харилцах хэлтсийн даргаар ажиллаж байсан Б.Эрдэнэбаярт албан тушаалтай нь холбогдуулан хахууль өгсөн.

УИХ-ын Тамгын газрын Хэвлэл мэдээлэл, олон нийттэй харилцах хэлтсийн дарга асан Б.Эрдэнэбаяр нь:

•  Дээрх албан тушаалыг хаших хугацаандаа өөрийн албаны чиг үүрэгт хамааралгүй ашиг сонирхлын үүднээс БОАЖЯ-ны Тусгай хамгаалалттай бүс нутгийн удирдлагын газрын даргын албан үүргийг түр орлон гүйцэтгэж байсан Д.Батмөнхөөр Богдхан уулын Дархан цаазат тусгай хамгаалалттай газарт байрлах Залаатын аман дахь 0.35 га газрын ашиглах хугацааг сунгасан гэрчилгээг гаргуулсан,
• 20 сая төгрөгийн хахууль авсан.

Тусгай хамгаалалттай бүс нутгийн удирдлагын газрын даргын албан үүргийг түр орлон гүйцэтгэж байсан Д.Батмөнх нь:

• "Евро сервис" ХХК-ийн хоёр жил дараалан газар ашиглаагүй зөрчилтэй гэдгийг мэдсээр байж илт хууль бус албан бичгээр төрийн захиргааны төв байгууллагад Богдхан уулын Дархан цаазат тусгай хамгаалалттай газарт байрлах Залаатын аман дахь 0.35 га газрын газар ашиглах тухай хүсэлт болон хугацаа сунгахыг дэмжсэн саналыг хүргүүлж Б.Ганбаярт давуу байдал олгосон.

Богдхан уулын дархан цаазат газрын хамгаалалтын захиргааны даргын албан үүргийг түр орлон гүйцэтгэж байсан Н.Пүрэвжав нь:

• "Евро сервис" ХХК-ийн Богдхан уулын Дархан цаазат тусгай хамгаалалттай газарт байрлах Залаатын аман дахь 0.35 га газрын зөрчлийг мэдсээр байж илт хууль бус албан бичиг ирүүлснийг үндэслэн газрын хугацааг сунган ашиглах гэрчилгээг гаргаж, Б.Ганбаярт давуу байдал олгосон нөхцөл тус тус  тогтоогджээ.

Шүүгч шийдвэрээ танилцуулж байна. Шүүгдэгч Д.Мөнх-Эрдэнэд дөрвөн жил хорих ял оноолоо. Мөн 82 сая төгрөгийг гаргуулж улсын төсөвт оруулахаар шийдвэрлэв.

Түүнийг эрх мэдэл, албан тушаалын байдлаа урвуулан ашигласан гэм буруутайд тооцож нийтийн албанд томилогдох эрхийг 3 жилийн хугацаагаар хасаж, хоёр жил 6 сарын хугацаагаар хорих ял оноов.

Мөн хахууль өгсөн гэм буруутайд тооцож нийтийн албанд томилогдох эрхийг 2 жилийн хугацаагаар хасаж, 1 жил 4 сарын хугацаагаар хорих ял тус тус оноолоо. Хорих ялыг нэмж нэгтгэснээр 3 жил 10 сар болж буй юм байна. Д.Мөнх-Эрдэнэ давж заалдах эрхтэй.

Мөн хууль сахиулагчийг эсэргүүцсэн гэм буруутайд тооцож 2.7 сая төгрөгөөр, худал мэдээлэл тараасан гэм буруутайд мөн тооцож 1 сая төгрөгөөр торгох ялаар шийтгэв.

Н.Пүрэвжавын:

• Нийтийн албанд томилогдох эрхийг хоёр жилийн хугацаагаар хасаж, 6 сая төгрөгөөр торгох ялаар,

Д.Батмөнхийн:

• Нийтийн албанд томилогдох эрхийг хоёр жилийн хугацаагаар хасаж, 6 сая төгрөгөөр торгох ялаар,

Б.Эрдэнэбаярын:

• Нийтийн албанд томилогдох эрхийг 7 жилийн хугацаагаар хасаж, 16 сая төгрөгөөр торгох ялаар,

Б.Ганбаярын:

• Нийтийн албанд томилогдох эрхийг 2 жилийн хугацаагаар хасаж 14 сая төгрөгөөр торгох ялаар тус тус шийтгэв.