Ройтерс агентлаг болон ВВС Монгол Улсын Ерөнхий сайд асан Сү.Батболдын хууль бус мөнгөөр худалдан авсан орон сууцтай холбоотой мэдээллийг нийтэлжээ.

Тодруулбал АНУ-ын эрх баригчид үл хөдлөхийн салбар дахь мөнгө угаах гэмт хэрэгтэй тэмцэх үеэрээ Сү.Батболд уул уурхайгаас хууль бус замаар олж авсан хөрөнгөөр Нью-Йоркт өндөр зэрэглэлийн хоёр орон сууц худалдаж авсныг зарласан. Түүний орон сууцыг хурааж авахаар ажиллаж байгаа хэмээн мэдэгдсэн байна.

2012 болон 2015 онд Сү.Батболдын гэр бүл 14 сая ам.долларын өртгөөр Манхэттен дүүрэгт орон сууц худалдан авчээ.

Тус мөнгийг 2011 онд Хонконгод бүртгэлтэй Catrison Limited компанид Эрдэнэт үйлдвэрээс зэсийн баяжмал худалдан авах уурхайн томоохон гэрээ байгуулсны шагнал болгон өгсөн 68 сая ам.доллароос гаргасан гэж үзэж байгаа аж.

Тус компани нь уул уурхайн үйл ажиллагаа явуулж байсан ямар ч түүхгүй бөгөөд Сү.Батболд итгэмжлэгдсэн зуучлагчдаараа дамжуулан удирдаж байсан хэмээн прокурорууд мэдээлжээ.

Бруклины холбооны прокурор Бреон Пийс “Батболд хууль бус авлигын схемээс олсон ашгаараа АНУ-ын холбооны хуулийг зөрчин өндөр зэрэглэлийн үл хөдлөх хөрөнгө худалдаж авсан” гэсэн байна.  

Сү.Батболд нь 2009-2012 онд Ерөнхий сайдаар ажиллаж байсан бөгөөд 2004 оноос хойш УИХ-ын гишүүний албыг хашиж байна.

2020 онд иргэний хэрэг хянан шийдвэрлэх явцад Сү.Батболдын өмгөөлөгч түүнийг Нью-Йоркт үл хөдлөх хөрөнгөгүй хэмээн мэдэгдэж байв.

2012 онд Catrison компанийн удирдах зөвлөлийн гишүүн өөрийн компанийн нэр дээр орон сууц худалдан авсан бөгөөд Сү.Батболдын хүү тус жил нь америк данс нээлгэхдээ оршин суух хаягаа дээрх орон сууцаар мэдүүлжээ.

Эх сурвалж: Reuters