Иргэний бүртгэл мэдээллийн төвийн үйл ажиллагаа, үйлчилгээний талаархи мэдээ мэдээллийг шуурхай, нээлттэй хүргэх, иргэдийг хүссэн мэдээллээ олж авах боломж нөхцлийг бүрдүүлэх, төрийн үйлчилгээг иргэдэд ойртуулах зорилгоор хэд хэдэн цахим үйлчилгээг нэвтрүүлж байгаа гэнэ. Тухайлбал вебээрээ дамжуулан "Онлайн лавлах 1890" чат ажиллуулж эхлээд байгаа аж. Дээрх чатад холбогдсоноор иргэд дэлхийн аль ч өнцөг булан бүрээс бүртгэлийн байгууллагатай холбоотой өөрт хэрэгтэй мэдээллээ авах боломжтой болж байгаа юм байна. Үүнээс гадна тус газрын аль шатанд хүнд суртал давамгайлж, үйлчилгээний аль салбарт чирэгдэл ихтэй байдагт. Тэр ч байтугай хэн гэдэг албан хаагч ёс зүйгүй байдал гаргасан зэрэг илэн далангүй санал хүсэлтээ үлдээж болох аж.

Энэхүү сайтад нэвтрэхдээ "yahoo messenger" хаягийг нээсэн байх шаардлагатай гэнэ. Үүний дараа Улсын бүртгэлийн ерөнхий газрын registrationmongolia.com веб сайт руу ороод нүүрний хэсэгт байгаа "1890 онлайн" гэсэн лавлах цонхон дээр дарахад "yahoo messenger" гэсэн цонх гарч ирдэг гэнэ. Дээрх цонхны "ок" гэсэн товчлуурыг дарахад "ubeg1890" гэсэн харилцах операторын хаяг нээгдэж хүссэн мэдээллийг татах боломж нээгддэг байна.

Түүнчлэн олон нийт өнгөрсөн оны нэгдүгээр сарын 1-нээс хойш авсан иргэний үнэмлэх, байр орон сууц, хашаа байшин зэрэг эд хөрөнгийнхөө гэрчилгээг үрэгдүүлсэн бол дээрх веб сайтаар орж хүчинтэй байгаа эсэхийг нь мэдэж болох нь. Ингэхдээ иргэд веб сайтын "хүчингүй бичиг баримт" гэсэн хэсэг рүү орж "хайх" гэсэн хэсэгт өөрийн регистрийн дугаарыг хийхэд холбогдох хүний бичиг баримтын талаархи  мэдээллийг авч болдог байна.

Н.Түвшинжаргал