Олон улсын музейн зөвлөлөөс санаачлан жил бүрийн 5 дугаар сарын 18 -ны өдрийг “Олон улсын музейн өдөр” болгон тэмдэглэдэг уламжлалтай. Энэ өдрийг угтан “Ардын цэнгэлдэх хүрээлэн-Бөмбөгөр ногоон театр” үзэсгэлэнг өнөөдөр Монголын театрын музейд  нээлээ.

Улаанбаатар хотын төвд Засгийн газрын ордны зүүн хэсэгт байрлаж байсан Ардын цэнгэлдэх хүрээлэнгийн европ маягийн барилга нь олны дунд “Бөмбөгөр ногоон” нэрээр алдаршсан юм.

Үндэсний хэлбэртэй архитектурын дурсгал, тухайн цаг үед соёл урлаг, улс төрийн үйл ажиллагааны төв болж байсан Ардын цэнгэлдэх хүрээлэнгийн барилга 1927 онд ашиглалтад орж, “Олон үндэстний концерт”-оор нээлтээ хийж байжээ. Тухайн үед монголд амьдарч байсан Унгарын иргэн, инженер Иозеф Гелета зураг төслийг гарган удирдаж, барилгын дотоод засал чимэглэл, тоноглолыг И.Климов, К.И.Померанцев, уран зураач У.Соёлтой нар бүтээж монгол, хятад, мужаан, барилгачид барьсан байна.
Энэхүү театрын барилга 20 гаруй жил манай орны соёл урлагийн төв болж байгаад 1949 онд галын аюулд өртөж шатсан аж.

Үзэсгэлэнд Бөмбөгөр ногоон театрын барилгын дотоод, гадаад байдал, байршлыг харуулсан гэрэл зургууд, жүжгийн хөтөлбөр, зурагт хуудас, уран зураг, ном сэтгүүл, тухайн үед тоглож байсан жүжгийн гэрэл зураг, барилгын макет, театрын хөшигний загвар зэргийг дэлгэжээ. Тухайлбал,  эдгээрээс “Соёлыг олон түмэндээ нэвтрүүлье” гэсэн монгол бичигтэй Улсын төв театрын анхны даавуун лого, 1991 онд Ардын зураач Ч.Гунгаасүх ахлагчтай “Бүтээл” хамтлаг, 2012 онд зураач Н.Хосбаяр, С.Ганзам нарын бүтээсэн Бөмбөгөр ногоон театрын макет онцлох бүтээлд тооцогдож байна.

Монголын театрын музейн эрдэм шинжилгээний ажилтан Ч.Сайнцэцэг, “Монгол Улсад амьдарч, Бөмбөгөр ногоон театрт зураачаар ажиллаж байсан Оросын алдарт зураач К.И.Померанцовын хийсэн тайзны хөшгийг 1991 онд Ардын зураач Ч.Гунгаасүх дууриалган эх загвараар нь хийсэн. Энэ хөшгийг олон түмэнд тэр бүр дэлгэж байгаагүй. Бөмбөгөр ногоон театр нь тухайн үедээ тохилог зоогийн газар, хувцас солих, биллиард тоглох, ажилчдын соёлжих өрөө болон номын сантай цогцолбор байсан. Бөмбөгөр ногоон театрт нийгмийн байдлыг харуулсан, нийгмийг шүүмжилсэн хөг аястай “Энэ ямар ёс вэ”, “Харанхуй засаг” зэрэг жүжиг тавьж үзэгчдийн хүртээл болгож байсан. Жүжигчид жил ирэх тусам мэргэжил, соёл, урлагийн хувьд улам сайжирч, олон алдартай уран бүтээлчид төрөн гарсан” гэв.

Үзэсгэлэн ирэх сарын 01-нийг хүртэл үзэгчдийн хүртээл болно.

Ж.Болор