Өсвөрийн төгөлдөр хуурчдыг дэмжих зорилгоор төгөлдөр хуурч Я.Мөнгөнцацалын нэрэмжит цөөхүүл хөгжимчдийн анхдугаар уралдааныг зохион явуулах гэж байна. Өнөөдөр Хөгжим бүжгийн коллежийн концертын их танхимд эхлэх энэхүү уралдааныг "Мөнгөнцацал-төгөлдөр хуур" сан, Хөгжим бүжгийн коллеж, Хүүхдийн төлөө үндэсний төв хамтран зохион байгуулж байгаа юм. Энэхүү уралдааныг Я.Мөнгөнцацалын нэрэмжит болгон зохион байгуулж байгаа нь их учиртай аж.

Тэрээр Хөгжим үжгийн дуид сургууль, Москва хотын Гнесиний нэрэмжит хөгжмийн институт төгссөн. Мөн Германы Дортмунд хотын хөгжмийн дээд сургууль, Мюнстер хотын хөгжмийн дээд сургуулийг дүүргэсэн ажээ. Я.Мөнгөнцацал 1985 онд Дэлхийн залуучууд, оюутны 12-р их наадамд оролцсон, 1991 онд Чайковскийн нэрэмжит төгөлдөр хуурчдын уралдаанд тэргүүн байр эзэлсэн, 1996 онд Италийн Пескара хотод зохигдсон олон улсын төгөлдөр хуурчдын уралдаанд тэргүүлж байжээ. Мөн 2001 онд Шуманы зохиолоор "Давидсбундлер" гэдэг анхны бие даасан цомгоо гаргасан, 2002 онд "Trio Musarto" гэдэг гурвал хамтлагаа байгуулж, 2004 онд "Trio Musarto" цомгоо гаргасан нь Европт их амжилтад хүрсэн байна.

Тэрээр Германд хөгжмийн багш хийдэг байсан бөгөөд ид хийж бүтээх насан дээрээ хорвоогийн мөнх бусыг үзүүлжээ. Түүний нэрийг мөнхжүүлэх, хүслийг биелүүлэх зорилготой энэхүү төгөлдөр хуурчдын уралдаанд 22 багийн хөгжимчид өрсөлдөх юм байна. Уралдаан энэ сарын 30-ны өдөр дүнгээ гаргаж шалгарсан хөгжимчдийн гала тоглолт ДБЭТ-т болох ажээ.