Орон нутгийн энэ удаагийн сонгуульд дуучин, жүжигчин, сэтгүүлч, бөх гээд элдвийн улс дэвшээд буй. Гэхдээ тэд нь  боловсон хүчний асар их "нөөцтэй" хэмээн ярьцгаадаг МАХН, АН-д ялалт авчрах учиртай улс юм байх.
Хэн, хэн гэдэг урлаг, спортынхон улстөрч болохоор шулуудаад байгаа талаар хэвлэлүүд хангалттай мэдээлсэн. Харин хошин урлагийн жүжигчин, "Шинэ үе"-ийн Бооёог сонгуулийн сурталчилгаа хийгээд "ухаан"-гүй манаргаж явааг хүмүүс тэр бүр мэдээгүй гэнэ. Түүний төрсөн дүү Баянгол дүүргийн ИТХ-ыг сонгох сонгуульд МАХН-аас нэр дэвшжээ. Тэгээд л "Шинэ үе"-ийнхэн сонгуулиар амьсгалаад завгүй яваа гэнэ.
Хөдөөд ч урлагийнхан нэр дэвшив. Тухайлбал, Хэнтий аймгийн ИТХ-ын сонгуульд орчин үеийн дууны яруу найрагч О.Түвшиндэмбэрэл өрсөлдөхөөр болжээ. "Киви" хамтлагийн "Улаан даашинз", "Хожуу ухаарал", дуучин ВХ-ийн “Sorrow", "Номин талст"-ын Хаянаагийн "Бодол, дуучин Алтанцэцэгийн "Бусдын энгэрт дасахгүй", "Классик жим" хамтлагийн "Чи байдаг" дууны шүлгийн зохиогч нь О.Түвшиндэмбэрэл аж.