Наадмын үеэр цаг агаар ямар байх талаар Ус, цаг уурын хүрээлэнгийн урьд­чилан мэдээлэх секторын эрхлэгч Ж.Цогтоос тод­рууллаа.

-Наадмын өдрүүдэд цаг агаар ямар байх вэ?
-Урьдчилсан төлөвөөс үзэхэд наадмын үеэр хур бороо элбэгтэй байх төлөвтэй байна. Ерөнхийдөө энэ долоо хоногийн ихэнх хугацаанд бороо орно. Тодруулбал, Яг наадмын үеэр буюу энэ са­рын 10, 11-нд ихэнх нутгаар хуртай. Мөн 12, 13-нд түр зуурын хур тунадас орох төлөвтэй байгаа. Энэ сарын 9, 10, 11-нд нутгийн баруун хэсгээс зүүн рүү чиглэсэн хур тунадас орох нөхцөл бүрдээд байна. 10-нд ихэнх нутгаар, 11-нд нутгийн зүүн хагаст, 12-нд нутгийн баруун хэсгээр бороо орно.

Тиймээс бороо их орох эдгээр өдрүүдэд ард иргэд маань үер усны аюулаас болгоомжлох хэрэгтэй байна. Ялангуяа энэ сарын 10-нд морины уралдаан эхэлнэ. Энэ үед гэхэд л ихэнх нутгаар бороо орно. Өглөөгүүр бороо ороод өдөр тийш намдах төлөв ажиглагдаж байгаа.

-Агаарын температу­рын хувьд ямар байх бол?
-Наадам өнгөртөл хүн ос­гохоор хэмжээнд хүйт­рэхгүй.

Гэхдээ бороо хуртай үед сайхан дулаахан болж ха­лахгүй нь ойлгомжтой. Уулар­хаг нутгаар шөнөдөө 5-10 хэм, өдөртөө 15-20 хэм ду­лаан байх нь. Харин говийн аймгуудын нутгаар нэлээд дулаахан, 30 хэм хүрч халах төлөвтэй байгаа. Говийн нут­гаар шөнөдөө 12-17 хэм, өдөртөө 23-28 хэм дулаан. Бусад нутгаар шөнөдөө 8-13 хэм, өдөртөө 18-23 хэм ду­лаан байна.

П.Энэбиш