Битүүмжлэгдсэн хөрөнгө хулгайн гараар орж байна гэв
Хадгаламж зээлийн хор­шоо (ХЗХ)-ны хохирогчид сэт­гүүлчдэд хандлаа. Тэд шүү­хийн шийдвэрээр би­түүмж­­лэгдсэн хөрөнгө бага багаар алга болоод байгаа талаар ярьсан юм.

Тухайлбал, энэ оны нэгдүгээр сард “Баян-Өндөр сан” хадгаламж зээ­лийн хоршооны битүүмж­лэгдсэн хөрөнгө болох 40 тоннын контейнертэй хоёр тэрбум төгрөгийн машины шинэ сэлбэг алга болсон байна. Мөн тус хоршооны “Пелиснер” төвийн дөрөв­дүгээр давхраас зурагт, ком­пьютер, диван зэрэг 30-аад сая төгрөгийн эд зүйл ал­дагдсан гэнэ. Цагдаагийн Ерөнхий газрын дарга Ч.Амар­болдод энэ мэдээг хэлэхэд “хуулиар битүүмж­лэгдсэн хөрөнгийг манайх харах үүрэггүй” гэснээр энэ хэргийг мөрдөх эзэнгүй бол­сон гэнэ. Энэ тухай “Баян-Өндөр сан” ХЗХ-ны хохирогч Д.Сэнгэдорж “Битүүмжилсэн хөрөнгийг энэ сард хүлээл­цэж эхлэхэд дээрх бараа алга болсон байсан юм. Шүүхийн шийдвэр гарснаас өдийг хүр­тэл “Баян-Өндөр сан” ХЗХ-ны эзэд болох Б.Самбалхүндэв, Р.Баярмаа нар ах дүүгээрээ дамжуулан “Пелиснер” төвийн доод давхрын 30 машины гараашийг бусдад засварын газрын зориулал­таар түрээсэлж байсан юм. Мөн “Коллектив” баарны нэрийг өөрчлөн ажиллуулж, ашгийг нь яллагдагчид хүртэж байсан баримт байгаа. Иймээс хор­шооны хөрөнгийг Шүүхийн шийдвэр биелүүлэх ерөнхий газарт хүлээлцэхэд цаг алд­сан цагдаагийн байгууллагын ажилтнуудад хариуцлага тоо­цох ёстой” гэлээ.

Хохирогчид Тагнуулын ерөнхий газарт хандана гэлээ
Хохирогчид битүүмжил­сэн хөрөнгөөс алга болсон нь цагдаагийн ажилтнуудтай холбоотой байж магадгүй гэж сэрдэж байгаа аж. Тиймээс нэр бүхий цагдаагийн ажилт­ныг шалгаж, хамтран ажиллах саналыг Тагнуулын ерөнхий газрын дарга Р.Болдод хүр­гүүлэхээр болжээ. Энэ тухай “Хадгаламж зээлийн хоршоо­ны хохирогчдын нэгдсэн түр хороо”-ны ерөнхий зохи­цуулагч Х.Оюунцэцэгээс тод­рууллаа.

-Битүүмжлэгдсэн хөрөнгөөс цагдаагийн ажилтнууд авч байгаа гэж үзэх болсон шалтгаан юу байна?
-Сүхбаатар дүүргийн шүүгч Ч.Хосбаярын шийд­вэрээр 30 гаруй үл хөдлөх хөрөнгийг шалтгаангүйгээр битүүмжлэлээс гаргасан бай­на лээ. ХЗХ-ны хэргийн мөр­дөн байцаах хэлтсийн ахлагч Алтансүх Сүхбаатар дүүр­гийн ҮIII хорооны нутаг дэвс­гэр XI хороололд дөрвөн дав­хар байшин бариулж байгааг олж мэдлээ. Төрийн албан хаагчид ийм их хөрөнгө бай­гаа гэдэг эргэлзээтэй. Мөн Цагдаагийн академийн захи­рал Энх-Амгалан Мөрдөн байцаах газрын дарга байх­даа “Бүтээн байгуулалт хөгж­лийн сан”-тай холбоотой “Тан­­саг өргөө” корпорацийн захирал Сүмбэр гэгчийг сул­лан явуулсан байдаг. Одоо тэр хүн олдохгүй эрэн сур­валжлагдаж байгаа. Энэ мэт цагдаагийн ажилтнууд гэмт хэрэгтнүүдтэй холбоотой болохыг батлах баримт их байна.

-Цагдаа нарыг шалгадаг өөр байгууллага бий. Таг­нуулын ерөнхий газарт хандах шаардлагатай гэж үү?
-ХЗХ-ны хэргээр маш их хэмжээний мөнгө алга болж, олон хүний амьдрал доройт­сон нь Үндэсний аюулгүй байдалд нөлөөлж байгаа. Гэ­тэл цагдаагийн байгууллага нь гэмт хэрэгтнүүдтэй хол­боотой ажиллаж байгаа нь харамсалтай. Иймээс Таг­нуу­лын ерөнхий газар энэ асуудалд анхаарлаа хандуу­лах цаг нь болсон. Энэ бол монгол хүний хөдөлмөрийн үр шим бусдын гарт орсон уч­раас Үндэсний хэмжээний гэж ойлгож болно гэв.

МАХН-ын нэр бүхий гишүүдийг сонгуульд нэр дэвшүүлэхгүй байхыг шардав
ХЗХ-ны хохирогчид хол­боо байгуулан хуулийн этгээд болж Монгол Улсын Ерөн­хийлөгчөөс эхлээд шат шатны хуулийн байгууллага, Хүний эрхийн үндэсний комисс гэх мэт байгууллагад нийтдээ 938 албан тоот бичгүүдийг хүргүүлж, жагсаал, цуглаан, өлсгөлөн зарлаад байгаа аж. Үүний үр дүнд 10 мянган хохирогчдын 67 тэрбум төг­рөгнөөс 33 тэрбумыг төрөөс өгөхөөр нэг удаагийн хууль батлагдсан.

Ийм хэрэг үүдэх эхлэ­лийг МАХН тавьсан гэж хохирог­чид үзэж байгаа аж. “Одоо­гоос дөрвөн жилийн өмнө УИХ-ын Байнгын хороо ХЗХ-ны асуудлыг хэлэлцжээ. Энэ хурлаар ХЗХ санхүүгийн ноц­той хямралд орсныг хүлээн зөвшөөрсөн ч сонгуулийн өмнө ийм мэдээг олонд дэл­гэж болохгүй гээд хав дарсан байгаа юм. Үүний үр дүнд 10 мянган өрх ядуурсан. Иймээс бид МАХН-ын Удирдах зөв­лөлд зарим хүмүүсийг сон­гуульд нэр дэвшүүлэхийг хориглосон мэдэгдэл хүр­гүүлж байгаа. Хэрвээ тэд сонгуульд нэр дэвших юм бол бид эцсийг нь хүртэл эсэргүүцэх болно” гэлээ.

Б.Цэцэгдэлгэр