АНУ-ын ерөнхийлөгч Дональд Трамп мягмар гарагт “Тесла” компанийн үйл ажиллагааг эсэргүүцэж байгааг "дотоодын терроризм"-д тооцохоо мэдэгдлээ. Үүгээрээ тэрбээр Илон Маскийг дэмжиж буйгаа илэрхийлэв.

Тодруулбал сүүлийн үед АНУ-д “Tesla Takedown” нэртэй хөдөлгөөн өрнөж буй.

Идэвхтнүүд Илон Маск АНУ-ын засаг захиргаанд орж, холбооны байгууллагуудын ажилтнуудыг цомхотгох, хүмүүнлэгийн хөтөлбөрүүдийн санхүүжилтийг цуцалж байгааг эсэргүүцэж байгаа юм.

Үүнээс гадна Трамп "Тесла"-ийн Model S цахилгаан автомашин худалдан авч буйгаа зарласан ба тус загварын үнэ 80 мянган ам.доллароос эхэлдэг аж.

Дэлхийн хамгийн баян хүмүүсийн жагсаалтад багтдаг Илон Маск Трампын засаг захиргаанд нэгдэн “Засгийн газрын үр ашигтай байдал”-ыг нэмэгдүүлэх хороог ахлан ажиллаж буй.

Трампын сонгуулийн кампанит ажлын үеэр түүнийг идэвхтэй дэмжсэн хүмүүсийн нэг нь яалт ч үгүй Илон Маск. Улмаар Трамп Маскийг дэмжиж буйгаа илэрхийлж байгаа нь энэ юм.

Энэ талаар Илон Маск "Ерөнхийлөгч Трамп болон түүний засаг захиргааны гайхалтай бодлогын үр дүнд "Тесла" ирэх хоёр жилийн хугацаанд автомашины үйлдвэрлэлээ хоёр дахин нэмнэ" гэжээ.

Үүнтэй зэрэгцэн “Тесла”-ийн хувьцаа мягмар гарагт бараг дөрвөн хувиар өссөн нь өнгөрсөн дөрвөн жилийн хамгийн том уналтын дараах сэргэлт байв.

Өнгөрсөн долоо хоногт 350 орчим хүн Портланд дахь “Тесла”-ийн худалдааны төвийн гадаа эсэргүүцлийн жагсаал хийсэн.

Энэ сарын эхээр Нью-Йорк дахь салбарынх нь гадна болсон жагсаалаар есөн хүн баривчлагдсан байна. “Тесла”-ийн үзүүлэнгийн танхим болон машинууд руу халдсан хэрэг ч гарсан бөгөөд эдгээрийг мөрдөн шалгаж байгаа гэв.

Эх сурвалж: Reuters