Их Британид төвтэй ОУ-д төлбөрийн системд суурилсан санхүүгийн бүх төрлийн үйлчилгээ үзүүлэгч Монгол Ай Ди Холдингс ХХК Киргизийн тэргүүлэх банкнуудын нэг болох Компаньон Банктай хамтран тус улсын зах зээлд хамгийн дэвшилтэт технологид суурилсан төлбөрийн шийдлийг нэвтрүүлэх зорилгоор Санамж бичиг /MoU/ зурлаа.

Тус санамж бичигт гарын үсэг зурснаар Киргиз улсын хэрэглэгчдэд  болон бизнес эрхлэгч нарт орчин үеийн, аюулгүй, үр ашигтай төлбөрийн шийдлүүдийг хүргэх томоохон алхам хийгдэж байна. Энэхүү хамтын ажиллагааны үндсэн дээр Компаньон Банкинд төлбөрийн систем, SoftPos, Нэгдсэн QR дэд бүтэц, болон бусад санхүүгийн  үйлчилгээг  нэвтрүүлэх боломжийг олгох юм.  Тус хамтын ажиллагааны үндсэн гүйцэтгэлийг хэрэгжүүлэхээр энэ өдөр Монгол Ай Ди Холдингс компани Киргиз улс дахь охин компани болох Minu Payment Solutions-ийг нээж албан ёсоор үйл ажиллагаагаа эхлүүлж байна. 

Тус нээлтийн үйл ажиллагаанд бизнес эрхлэгчид, ОУ-ын байгууллагын төлөөлөл хүрэлцэн ирсэн бөгөөд:

• Киргиз улс, Бишкек дэх ИБУИНХУлсын Элчин Сайдын Яамны Төв Азийг хариуцсан Бүс нутгийн Эдийн засгийн хөгжлийн зөвлөх: Charlie Morris
• Киргиз улсын тэргүүлэх банкнуудын нэг “Компаньон Банк”-ны Гүйцэтгэх захирал: Черикбаева Маргарита
• Монгол Ай Ди ХХК-ийн Гүйцэтгэх захирал: Г.Батгэрэл
• Киргиз дэх Мину Пэймэнт Солюшнс компанийн Гүйцэтгэх захирал: Б.Бодьгэрэл нар нээлтийн туузыг хайчилж албан ёсоор үйл ажиллагааг эхлүүлжээ.  

Нээлтийн ёслолын үеэр Киргиз дэх Minu Payment Solutions компанийн Гүйцэтгэх захирал  Б.Бодьгэрэл:

“Бид  өөрсдийн технологи, төлбөрийн системийн дэд бүтцээ Киргизэд амжилттай нээж буйд баяртай байна. Манай компанийн шийдлүүд  жижиг дунд бизнес эрхлэгч болон томоохон байгууллагуудын үйл ажиллагааг хялбаршуулж, төлбөрийн экосистем бүрдүүлнэ гэдгийг онцлон дурджээ.

Мөн хамтын ажиллагааны гол түнш “Компаньон Банк”-ны Гүйцэтгэх захирал хатагтай: Черикбаева Маргарита:

"Компаньон Банк санхүүгийн дэд бүтцийг бэхжүүлж, инновацад чиглэсэн аливаа санаачилгыг үргэлж дэмжсээр ирсэн. Өнөөдөр эхэлж буй хамтын ажиллагаа ч үүний нотолгоо болж байна. Монгол Ай Ди Холдингс компани Киргиз улсад шинэ салбараа нээж буй нь манай хоёр компанийн хувьд төдийгүй манай улсын санхүүгийн салбарын хувьд чухал алхам болж байна. Minu Payment Solutions компанийн санал болгож буй орчин үеийн төлбөрийн систем, дижитал шийдлүүд нь манай улсын бизнес эрхлэгчдийн салшгүй хэрэгсэл болж, илүү үр ашигтай, найдвартай, шуурхай ажиллах боломжийг олгож буйг онцлох нь зүйтэй."

Монгол Ай Ди компани 2015 онд үүсгэн байгуулагдсан бөгөөд финтек салбарт тэргүүлж,  дотоодод 2025 оны эхний улирлын байдлаар 40,000 хэрэглэгчтэй болсон байна. Мөн энэ оны онцлох амжилт нь Их Британийн Засгийн Газрын “Глобал Энтрепренер Программ”-д оролцож, Монгол Ай Ди Холдингс нэрээр төв оффисоо ИБУИНХУлсруу шилжүүлсэн явдал юм. Энэхүү нээлтийн ёслолд хүрэлцэн ирсэн Бишкек дэх ИБУИНХУлсын Элчин Сайдын яамны Төв Азийг хариуцсан Бүс нутгийн эдийн засгийн хөгжлийн зөвлөх ноён Charlie Morris онцлохдоо:

"Дотооддоо амжилттай хэрэгжсэн санхүүгийн бүтээгдэхүүн ОУ-д ийнхүү тэлж байгаа түүхэн үйл явдалд дэмжлэг үзүүлэн оролцож буйдаа баяртай байна. Монгол Ай Ди Холдингс компанийн хувьд ИБУИНХУлсад төв оффисоо шилжүүлснээр ОУ-ын түвшинд бүтээгдэхүүнээ илүү өргөн зах зээлд хүргэх боломжыг тэдэнд олгож буй юм" гэж цохон дурджээ.

Нээлтийн үеэр Монгол Ай Ди Холдингс ХХК-ийн ОУ-ын Стратеги хариуцсан захирал  Б.Төгстөгөлдөр:

"Манай компанийн шинэ салбар Киргиз улсад нээгдэж буй нь зөвхөн бизнесийн цар хүрээгээ тэлж буйгаас өргөн ойлголт юм. Бид энэ ажлыг цаашид Их Британи болон Төв Азийн хооронд дижитал гүүр байгуулах томоохон зорилгын эхлэл гэж харж байгаа" гэж дурдсан нь тус компанийн Төв Азийн өргөн зах зээлд хүрч, бүс нутгийн хэмжээнд үйл ажиллагаагаа өргөжүүлэх стратегийн сууриа тавьж буй явдлыг улам бүр баталгаажуулж байна.