УИХ-ын чуулганаар Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэх эсэх хэлэлцүүлгийг хийлээ.

Үүнтэй холбогдуулан УИХ-ын гишүүн С.Бямбацогт үг хэллээ. Тэрбээр “Энэ хуулийн төслийг хэлэлцэхийг дэмжиж байна. Бид хэт туйлширч болохгүй. Энэ хуулийн 4.1.1-т Хүний эрх, эрх чөлөөг хангах хууль зүйн баталгааг бүрдүүлэх гэж заасан. Энэ хууль бүрийн үзэл баримтлалд суух ёстой заалт юм.

Бид өнөөдөр нийгмийн сэтгэл зүйг дагаад хууль санаачилж, баталдаг. Сөрөг үр дагавар нь ч их гардаг. Олон нийтэд таалагдах гэж хууль санаачилдаг. НӨАТ-ыг таван хувь болгоно гээд. Таван хувь болбол Монгол Улсын төсвийн орлого бүрдэхгүй. Төсвийн орлого бүрдэхгүй бол цалин, тэтгэвэр, хүүхдийн мөнгөө өгч чадах уу, үгүй юу гэдэг асуудал үүснэ. 

Сая бас бид ХХОАТ-ын нэг хувь болгох талаар ярьж эхэллээ. Үүнийг шатлалтай тогтооё гэж ярьж байна. Улаанбаатарт таван хувь, орон нутагт гурван хувь, суманд нэг хувь гэдэг ч юм уу. Улс даяар нэг хувь болчихвол сөрөг үр дагавартай. Иймэрхүү зүйлийг тал талаас нь хардаг баймаар байна. 

Хууль тогтоомжийн тухай хуульд нэмэлт, өөрчлөлт орсноор иймэрхүү зүйлийг харах боломж бололцоо бүрдэнэ гэж харж байна. Монгол Улс 437 хуультай, 2403 заалттай. Үүнээс давсан 2500 журамтай. Үүнээс болж ард иргэдэд хүнд суртал үзүүлдэг, төрийн албан хаагчид өөрсдөдөө давуу байдал үүсгэж, шан харамж, авлига авах нөхцөл бүрддэг. Үүнийг энэ хууль шийднэ гэж харж байна" гэв.

ШУУД ҮЗЭХ: