УИХ-ын гишүүн Б.Найдалаагаас Төрийн ордонд ажилладаг сэтгүүлчид Ерөнхий сайдын орлогын талаарх байр суурийг асуужээ. Тэрээр дараах хариултыг өгөв.

-Ерөнхий сайд ч бай, хэн ч бай орлогоо нотолж чадахгүй бол хариуцлага хүлээх ёстой. Ерөнхий сайд өөрөө тайлбар хийх байлгүй.

Зарчим нь ойлгомжтой. Яаран дүгнэлт хийх нь утгагүй. Мэдээж цаана нь улс төр бий л байх. Нэгэнт иргэд жагсаж байгаа тул Ерөнхий сайд тайлбараа хийж, орлогоо нотлох байх. Хууль зөрчсөн нь тогтоогдвол ёсзүйн хариуцлага хүлээх ёстой. АТГ энэ хэргийг үнэн зөв шалгана гэж найдаж байна. Хуулиар хүлээсэн чиг үүргээ хэрэгжүүлэх байх.

ХҮН хамтарсан Засагт орсон. Бид том төслүүдээ явуулах ёстой гэсэн хатуу үнэмшилтэй. Бид толхилцоод, талцаад том байтугай жижиг асуудлаа шийдэж чадахгүй, хөдөө жийлцээд 30 жил явлаа. Үүнийг шийдэхийн тулд зайлшгүй хамтрах ёстой. Иргэдийн орлогыг өсгөх ёстой. Саяынх бол ёс зүйн тусдаа асуудал гэв.

ХҮН-ын дарга Т.Доржханд өчигдөр (2025.05.15)энэ асуудлаар байр сууриа илэрхийлэхдээ "Иргэдийн улс төрийн мэдлэг муу байна. АН, ХҮН сөрөг хүчин байх ёстой гэдэг. Бид шал өөр эрхзүйн тогтолцоонд орсныг ойлгооч ээ. Бид Америкийн системийг хуулж, улсаараа популизмд орсон.

Нэг нь эрх баригч, нөгөө нь сөрөг хүчин гэж явсаар том төслүүдээ явуулж чадаагүй. Нэг нэгэндээ дэгээ тавьж, ажил хийлгэхгүй 35 жил явсан.

2019 онд Үндсэн хуульд өөрчлөлт оруулж, баруун Европын, Германы загварыг авлаа. Яагаад үүнийг нэвтрүүлсэн гэхээр хоёр нам нэг намын систем руу орчихлоо. Нэг нэгнээ ажил хийлгэдэггүй юм байна. Иймд Засгийн газрууд 1.5-1.8 жилийн хугацаатай ажилласан.     

Цаашдаа дандаа хамтарсан Засгийн газар байж, томоохон төслүүдээ хөдөлгөх боломжтой. Гашуунсухайт-Ганцмодны төмөр замын хил холболтыг бид 75 жилийн дараа нээсэн нь маш харамсалтай. Социализмын жилүүдэд ч эдгээр хоёр боомтоо холбож чадаагүй. Өргөн, нарийн цариг гэж маргасаар, танк орж ирнэ гэсээр таарсан. Бусад улс ч нөлөөлөн гацаасан. Үүний уршгаар бид 60 тэрбум ам.долларын орлогоо алдсан.
       
Ерөнхий сайдын хувьд олон улсын жишгээр орлогоо нотлох нь зүйн хэрэг гэсэн юм.