Олон сараар, тусгай бэлтгэгдсэн авьяастнууд л балетын дүрд тоглох боломжтой гэсэн ойлголтыг “Цөмөөч ханхүү ба хулганын хаан” балет эвджээ. Ирэх бямба, ням гаригт СТӨ-нд 150 хүүхэд, томчуудын бүрэлдэхүүнтэй тоглох тус балетад гурван сар бэлтгэсэн хүүхдүүдийн зарим нь  ээжтэйгээ хамт тоглоно.  

Олон улсын урлаг боловсролын хөгжлийн “Гэрэлт ертөнц” академи “Дэлхийн соёл Монгол хүүхдэд” төслийн хүрээнд “Цөмөөч ханхүү ба хулганын хаан” наадмыг хоёр дахь жилдээ зохион байгуулж байна. ОХУ-ын балетын жүжигчдийн хамт энэ сарын 28, 29-нд Соёлын төв өргөөнд тоглоно.    

Дэлхийн аль ч оронд шинэ жилийн баяраар урлагийн гайхамшгийг мэдрүүлэн, шидэт ертөнцөөр аялуулдаг сонгодог урлагийн тоглолтыг илүү олон хүүхэд, томчуудад хүргэхийн тулд олон шинэ шийдэлтэй зохион байгуулж байгаагаа “Гэрэлт ертөнц” академийн тэргүүн, балетчин Ч.Батгэрэл  танилцууллаа.

Тэрээр “Бид хүүхдүүдэд зөвхөн тоглолт үзээд зогсохгүй тайзан дээр шидэт үлгэрийн дүр бүтээх хаалгыг нээдгээрээ онцлог. Манай сургалтыг ОХУ-д балетын мэргэжил эзэмшсэн, хайр татсан олон дүр бүтээж амилуулсан багш нар эрхлэн явуулдаг.

Бидний илүү олон хүүхдийг тоглолтдоо хамруулж, балетын урлагаар хичээллэх боломжийг олгохыг зорьж байна. “Цөмөөч ханхүү ба хулганын хаан” балетдаа цасан ширхгийн бяцхан охидоос эхлээд Орос, Хятад, Испани үндэстний хүүхэлдэй гээд олон дүр нэмж дэглэж байна.

Эцэг эхчүүд түгжээнд хүүхдүүдээ хичээл сургалт таслуулахгүй зөөж хамруулж байгаад үнэхээр их талархаж байна. Сургалтад хамрагдсан хүүхдүүд балетын урлагт улам бүр догдолж дурладаг. Тиймээс бид хүүхдүүдээ уйгагүй зөөж байгаа ээжүүддээ бэлэг барихаар 19-р зууны хатагтайн дүрд бүжиглэх санал тавьсан.

Эцэг эхчүүд баяртай хүлээн авч, ордны бүжгийн сургалтад хамрагдан хүүхдүүдтэйгээ хамт бүжиглэж байна. Ер нь бидний тоглолт гэр бүлээрээ цугласан баярт мөчүүд болж өрнөдөг. Хүүхдүүд энэ сонгодог урлагийн бүтээлийг үзээд зогсохгүй суралцаж, жүжигт оролцон тоглосноороо олон талаараа хөгждөг” гэлээ.  

“Гэрэлт ертөнц” академи нь сонгодог урлагаар дамжуулан үндэсний бахархлыг бий болгохын зэрэгцээ өв тэгш үндэсний ухамсарт эх оронч монгол хүнийг төлөвшүүлэхэд хувь нэмэр оруулах зорилготой “Дэлхийн соёл Монгол хүүхдэд” төслийг санаачилжээ.