Энэ сарын 08-ныг хүртэл ихэнх нутгаар салхи шуурга багатай ч хүйтэн хэвээр байна. Тиймээс хол, ойрын замд гарахдаа аюулгүй байдлаа хангаж, зөв зохистой хувцаслаж, малаа ойрын бэлчээрт хариулах, бага насны хүүхдийг малд явуулахгүй байхыг Цаг уур, орчны шинжилгээний газраас зөвлөв.

Тэгвэл цасан шуурганы өмнө иргэд, малчид, тээвэрчид ямар арга хэмжээ авах вэ?

• Цаг агаарын гамшигт болон аюулт үзэгдлийн урьдчилан сэргийлэх сэрэмжлүүлэг, мэдээ, дохиог хэвлэл мэдээллийн хэрэгсэл, мэдээллийн бусад эх сурвалжаас тогтмол хүлээн авч, бусдад дамжуулах, айл хотлоороо хамтран бэлтгэл байдлыг хангах
• Тэнгэрийн байдал, үүл, салхины чиг, мал амьтны хөдөлгөөн, араншинг шинжих гэх мэт цаг агаарыг таньж мэдэх ардын уламжлалт арга ухаанаас хүүхэд залуучуудад өвлүүлэх
• Аюулт үзэгдлийн үед өөрийн болон бусдын эрүүл мэнд, амь насыг хамгаалах, аврах, анхан шатны тусламж үзүүлэх мэдлэг, дадлагатай болох

• Хоол хүнс, ундны ус, түлш, анхны тусламж үзүүлэхэд шаардлагатай эм тариа анхны тусламжийн хайрцаг, ариун цэврийн хэрэглэл, дулаан хувцас бэлтгэх, гэр мэтийн хөнгөн сууцыг хүнд зүйлээр даруулан бэхлэх
• Гар утас, радио, телевиз, гэрэлтүүлэх хэрэгслийг цэнэглэх, бэлэн байлгах
• Мал сүргээ ойр байлгах салхи, шуурга ойртсон үед өвөлжөө, хашаанд байлгах
• Чухал бичиг баримт, үнэт зүйлсээ хийсэхээс хамгаалсан найдвартай газар хадгалах, түүнийг гэр бүлийн гишүүд мэддэг байх
• Хүүхэд, жирэмсэн эх, өндөр настан, хөгжлийн бэрхшээлтэй хүмүүст тавих хараа хяналтыг сайжруулах, аюулгүй байдлыг нь хангах
• Өвс тэжээлийн нөөцтэй байх, хашаа саравчаа дулаалах, худаг усыг хамгаалах, нөмөр нөөлөг газруудыг тогтоох, түүнийг хүн бүр мэддэг байх
• Мал сүргийн тоо толгойд хүрэлцэхүйц хэмжээтэй өвөлжөө, хашаа хороог барьж бэлтгэх. Өвөлжөө, хашаа хороог цас болон шороонд дарагдахаас хамгаалсан далан болон хаалт барих
• Амь насны, эд хөрөнгийн болон гэнэтийн ослын даатгалд хамрагдах
• Өндөр хүчдэл, цахилгааны шугамын дор гэр, сууцаа барихгүй байх