Үндэсний хөрөнгө оруулагч “QSC” компани Сэлэнгэ аймагт "Уул уурхай металлургын цогцолбор" төслийг концессын гэрээгээр хэрэгжүүлж эхлээд байна. Энэ хүрээнд концессын гэрээнд тусгагдсан дэд бүтцийн нэг томоохон бүтээн байгуулалт болох Сэлэнгэ аймгийн Дулаанхаан өртөөнөөс Хүдэр сум хүртэлх нийт 102.8 км хатуу хучилттай автозамын барилгын ажлыг эхлүүллээ.

Ирэх 24 сарын хугацаанд автозамыг бүрэн барьж, байгуулахаар тооцоолж байгаа ч ирэх онд багтан хүлээлгэн өгөх боломжтой гэж төсөл хэрэгжүүлэгч, хөрөнгө оруулагч компанийн зүгээс үзэж байна. Засгийн газраас түүхий эдийг боловсруулж, эцсийн бүтээгдэхүүн үйлдвэрлэх чиглэлд томоохон төслүүдийг хэрэгжүүлж эхлээд байгаа юм.

Үүний нэг болох хар төмөрлөг, уул уурхайн металлургын цогцолбор байгуулах төслийг үндэсний хөрөнгө оруулагч “QSC” компани Төр, хувийн хэвшлийн түншлэлийн хэлбэрээр хэрэгжүүлж байна. Төмрийн хүдрээс нэмүү өртөг шингэсэн, эцсийн ган бүтээгдэхүүн үйлдвэрлэх зорилготой хэрэгжүүлж байгаа дээрх төслийн хүрээнд хэд хэдэн дэд бүтцийн томоохон ажлууд хийгдэж байгаа юм.

Үүний нэг болох автозамын барилгын ажил эхэлсэн бол төмөр замын бүтээн байгуулалтын ажил удахгүй дуусна гэж “Дарханы төмөрлөгийн үйлдвэр” ХК-иас мэдээллээ. Сэлэнгэ аймгийн Ерөө, Жавхлант, Хүдэр сумдыг дайрч өнгөрөх хатуу хучилттай автозам нь орон нутгийн хөгжилд ихээхэн ач холбогдолтой болохыг албаныхан онцолж байна.

Мөн шинэ автозам нь энэ бүс нутагт үйл ажиллагаа явуулж байгаа олон зуун компаниудын тээврийн өртгийг бууруулахаас гадна орон нутагт аялал, жуулчлал хөгжих боломжийг нэмэгдүүлж, байгаль орчин, хөрсний бохирдлыг бууруулах зэрэг олон талын ач холбогдолтой гэж үзэж байгаа юм.

Үүнээс гадна барилгын ажлыг үндэсний компаниуд, үндэсний мэргэжилтэй ажилчид хамтран хэрэгжүүлж байгаагаараа онцлог болохыг Аж үйлдвэрийн сайд онцолж байна.