Монгол Улсын Төрийн шагналт, Урлагийн гавьяат зүтгэлтэн кино зураглаач, найруулагч Бэгзийн Балжинням есдүгээр сарын 5-ны өдөр өвчний улмаас таалал төгслөө.

Тэрбээр 1942 онд Ховд аймгийн Чандмань суманд мэндэлсэн бөгөөд Улаанбаатар хотын хоёрдугаар 10 жилийн сургуулийг 1962 онд, Москва хотын Бүх Холбоотын Кино урлагийн дээд сургуулийг 1969 онд төгсчээ.

Монголын кино урлагийн цаглашгүй их авьяастан Б.Балжинням нь ард түмнийхээ сэтгэлд зүрхэнд мөнхөрсөн "Мандухай цэцэн хатан", "Гарын таван хуруу", "Би чамд хайртай", "Мөнх тэнгэрийн хүчин дор", "Ацаг шүдний зөрүү", "Говийн зэрэглээ", "Илүү сартай зун", "Гэрлэж амжаагүй явна", "Моторын дуу" зэрэг  олон арван киноны ерөнхий найруулагч, кино зохиолч, зураглаачаар ажиллаж байв.

Түүнчлэн гадаадын 40 гаруй уран сайхны киног эх хэлнээ орчуулж, 80 гаруй баримтат киноны зураглаач, найруулагчаар ажиллажээ.

Тэрбээр "Мандухай цэцэн хатан", "Гарын таван хуруу", "Би чамд хайртай", "Монгол оронд айлчилна уу" зэрэг кинонуудаараа олон улсын кино наадмуудад оролцож шагнал хүртэж байв.

Б.Балжинням нь Монголдоо төдийгүй дэлхий дахинд алдар нэрээ дуурсгасан кино урлагийн нэрт зүтгэлтэн байсан юм.

Талийгаачийн гэр бүл, ахан дүүс, төрөл төрөгсөд, анд нөхдөд гүн эмгэнэл илэрхийлье.