OWSD-Elsevier Foundation Award нь дэлхийн хөгжиж буй орнуудын эмэгтэй эрдэмтэн, судлаачдад олгодог нэр хүнд бүхий шагнал юм.

2021 оны энэхүү шагналын эздийн нэгээр математикийн шинжлэх ухааны доктор Д.Хонгорзул шалгарчээ. Ингэснээр тэрээр бусад шилдэг дөрвөн эмэгтэй эрдэмтэн, судлаачдын хамт  АНУ-ын Шинжлэх ухааныг дэмжих нийгэмлэгийн (AAAS) уулзалтад оролцох эрхтэй болсон байна.

Тус уулзалтын үеэр дэлхийн өнцөг булан бүрээс ирсэн мэргэжил нэгтнүүдтэйгээ холбоо тогтоож, хамтын ажиллагааны сүлжээ бий болгон семинарт оролцож, салбарынхаа мэргэжилтнүүдтэй уулзах болоод орон нутгийн лаборатори, байгууллагуудад зочлох боломжтой аж.

2012 оноос эхлэн эмэгтэй эрдэмтдийн шинжлэх ухааныг хөгжүүлэхэд оруулсан хувь нэмрийг үнэлж энэхүү шагналыг олгодог болсон уламжлалтай.

Жил бүр дараах бүс нутгуудаас шилдэг таван эрдэмтдийг тодруулдаг. Үүнд: 

• Латин Америк ба Карибын тэнгис;
• Зүүн ба Зүүн Өмнөд Ази, Номхон далайн бүс нутаг;
• Төв ба Өмнөд Ази;
• Арабын бүс нутаг;
• Сахарын өмнөд Африк багтана.

Д.Хонгорзул математикч мэргэжилтэй. Тэрээр шинжлэх ухаан, инженерийн салбарын хэрэглээний болон онолын математикийн салбар болох бутархай дифференциал тэгшитгэл (FDE) –ийг судалсан туршлагатай. FDE нь физик, хими, биологи, эдийн засаг зэрэг олон хэрэглээний шинжлэх ухааны нарийн төвөгтэй систем, үйл явцыг дүрслэн харуулах хэрэгсэл хэмээн тайлбарлаж болох юм.

Д.Хонгорзул хэрэглээний математикийн чиглэлээр МУИС-ийн бакалаврын ангид сурч байхдаа оюутны эрдэм шинжилгээний бүтээлийн уралдааны шилдгээр шалгарч байжээ.

Д.Хонгорзул докторын зэрэг хамгаалсныхаа дараа математикийн шинжлэх ухааныг гүнзгий судалсан судлаачдын нэг болж эх орондоо ирж байжээ.

Тэрээр мөн хэрэглээний математикийн чиглэлээр магистрын зэрэг хамгаалж, Японы засгийн газрын тэтгэлгээр тус улсын Кюүшюгийн их сургуульд докторын зэрэг хамгаалсан байна.

Тэрээр Кюүшюгийн их сургуульд суралцаж байх хугацаандаа FDE-ийн талаарх судалгаагаа эхлүүлж байжээ. Докторын зэрэг хамгаалах сүүлийн жилдээ тэрээр олон улсын оюутнуудын дунд "Математикт аж үйлдвэр" форумын уралдаанд оролцож байсан аж. Д.Хонгорзул докторын зэрэг хамгаалсныхаа дараа математикийн шинжлэх ухааныг гүнзгий судалсан судлаачдын нэг болж эх орондоо ирж байжээ.  Тэрээр 2018 оноос МУИС-ийн багшаар ажиллаж эхэлсэн байна хэмээн elsevier сайтад бичжээ.