Хөл бөмбөгийн ертөнц дэх өвлийн солилцоо наймааны цонх өнөөдөр өглөө хаагдлаа. Энэ өвөл коронавируст цар тахлын улмаас эдийн засаг нь хүндэрсэн клубүүд өмнөх жилүүдтэй харьцуулахад цөөн бөгөөд хямд наймаануудыг хийсэн юм.

Энэ өвөл хамгийн өндөр үнээр зарагдсан 10 тоглогчийг танилцуулж байна.

1. Саид Бенрама /Алжир/ - 23 сая евро

Английн Брентфорд клубийн жигүүрийн довтлогч Саид Бенрама 23 сая еврогоор Уэст Хэм Юнайтед клубд нэгдлээ. 25 настай тэрээр Уэст Хэм клубд зээлээр тоглож байсан юм.

2. Себастиан Алле /Кот д’Ивуар/ - 22.5 сая евро

Английн Уэст Хэм клубийн довтлогч Себастиан Алле Нидерландын Аяакс клубд 22.5 сая еврогоор нэгдлээ. Жилийн өмнө Германы Франкфурт клубээс ирж байсан тэрээр 26 настай.

3. Амад Диалло /Кот д'Ивуар - Итали/ - 21 сая евро

Кот д'Ивуар гаралтай Итали жигүүрийн довтлогч Амад Диалло Италийн Аталанта клубээс Манчестер Юнайтед клубд 21 сая еврогоор нэгдсэн. Ердөө 18 настай хүү transfermarkt дахь зах зээлийн үнээсээ харьцангуй дээгүүр үнэлэгдсэн юм.

4. Доминик Шобослай /Унгар/ - 20 сая евро

Өдгөө 20 настай Унгарын шигшээ багийн түлхүүр тоглогч Доминик Шобослай Австрийн Зальцбург клубээс Германы Лайпзиг клубд 20 сая еврогоор нэгдсэн.

5. Крепин Диатта /Сенегал/ - 20 сая евро

Бельгийн Клуб Брюгге клубийн жигүүрийн довтлогч 21 настай Крепин Диатта Францын Монако клубд 20 сая еврогоор нэгдсэн.

6. Николо Ровелла /Итали/ - 18 сая евро

Италийн Женоа клубийн хагас хамгаалагч 19 настай Николо Ровелла Италийн Ювентус клубд 18 сая еврогоор нэгдсэн. Түүнийг авсны маргааш нь Женоа клуб рүү эргэн нэг жилийн хугацаатай зээлсэн байна.

7. Паулиньо /Португали/ - 16 сая евро

Португалийн Брага клубийн довтлогч 28 настай Паулиньо мөн Португалийн Спортинг клубд 16 сая еврогоор нэгдлээ.

8. Морган Сансон /Франц/ - 15.8 сая евро

Францын Марсель клубийн хагас хамгаалагч 26 настай Морган Сансон Английн Астон Вилла клубд 15.8 сая еврогоор нэгдлээ.

9. Жеоффри Кондогбиа /Төв Африкийн БНУ/ - 15 сая евро

Испанийн Валенсиа клубийн хамгаалагч 27 настай Жеоффри Кондогбиа 15 сая еврогоор Испанийн Атлетико Мадрид клубд нэгдсэн.

10. Педру /Бразил/ - 14 сая евро

Италийн Фиорентина клубийн довтлогч 23 настай Педру Бразилын Фламенгу клубд 14 сая еврогоор нэгдсэн.