Монгол Улсад сүүлийн 10 жилд 6 удаа зудын гамшиг тохиожээ.

2024 оны тавдугаар сар хүртэл авч хэрэгжүүлэх зудын гамшгийн хариу арга хэмжээний төлөвлөгөөнд 4.6 сая ам.долларын санхүүжилт шаардлагатай байгааг НҮБ анхаарууллаа.

Энэхүү төлөвлөгөө нь туслалцаа шаардлагатай 150 мянга гаруй хүнээс зорилтот бүлгийн 33.4 мянган хүнд чиглэхээр байна. Төлөвлөгөөг хэрэгжүүлэхэд нийт 6.3 сая ам.доллар шаардлагатай байгаагаас 1.7 сая ам.доллар нь бүрдсэн бол дахин 4.6 сая ам.доллар шаардлагатай байгаа аж.

Хохирлын хэмжээ нь жилд ойролцоогоор 50-70 тэрбум төгрөг хүрч байна.

Чиглэлийн хоол хүнс, эрүүл мэнд, боловсрол, тэжээл, ариун цэвэр зэрэг долоон чиглэлд тусламж хэрэгцээтэй хүмүүсийг тодорхойлоод байгаа бөгөөд Архангай, Баянхонгор аймагт тусламж шаардлагатай бүлэг хамгийн олон байна.

Зудын үед буюу II-IV сард малын хорогдол хамгийн өндөр байдгийг НҮБ-ын тайланд онцолжээ. НҮБ-ын мэдээлснээр Монгол Улсад сүүлийн 10 жилийн хугацаанд зургаан удаа зудын гамшиг тохиосон байна.

Харин шилэн зудын нөхцөл байдал 2010 оноос хойш энэ он хүртэл болж байгаагүй аж. 2010 оны шилэн зудаар Монгол Улсын нийт мал сүргийн 25 орчим хувь буюу 10.3 сая мал үрэгдсэн байдаг.

Монгол Улсын мал аж ахуй нь нийт орон нутгийн иргэдийн 80 орчим хувийн өрхийн амьжиргааг хангадаг гэдэг утгаараа эдийн засгийн чухал бүрдэл хэсэг болдог. Тиймээс гамшгаас сөрөг нөлөөллийг буруулах зорилгоор шилэн болон цагаан зудад өртсөн 17 аймгийн 154 сумын өрхөөс сонгож туслах төлөвлөгөө гаргасан байна.

Монгол Улсад өнгөрсөн 80 жилийн хугацаанд агаарын дундаж хэм цельсийн 2.46 хэмээр нэмэгдээд байгаа юм. Мөн байгалийн гамшигт үзэгдлийн давтамж хоёр дахин нэмэгдэж, хохирлын хэмжээ нь жилд ойролцоогоор 50-70 тэрбум төгрөг хүрч байгааг НҮБ-ын тайланд дурджээ.