• Хойд Солонгосын удирдагч энэ сард Оросыг зорино
• Уулзалтаар ОХУ-д зэвсэг нийлүүлэх тухай хэлэлцэнэ
• Сергей Шойгу Хойд Солонгост айлчлах үеэр Ерөнхийлөгч Ким зэвсгийн үзэсгэлэнгээ танилцуулсан

Хойд Солонгосын удирдагч Ким Жон Ун энэ сард ОХУ-ын Ерөнхийлөгч Владимир Путинтэй уулзахаар Оросыг зорихоор болжээ. Хоёр улсын удирдагчид Орос-Украины дайнтай холбоотойгоор Хойд Солонгосоос ОХУ-д зэвсэг нийлүүлэх тухай хэлэлцэх аж.

Цагаан ордноос өмнө нь ОХУ, Хойд Солонгосын хооронд зэвсгийн хэлэлцээ хийгдэж буй тухай мэдээлсэн. Тодруулбал АНУ-ын Үндэсний Аюулгүй Байдлын Зөвлөлийн хэвлэлийн төлөөлөгч “ОХУ-ын Батлан хамгаалахын сайд Сергей Шойгу саяхан Хойд Солонгос руу хийсэн айлчлалаараа тус улсын ерөнхийлөгчийг зэвсэг худалдахад ятгасан” хэмээн хэлжээ.
Шойгугийн айлчлалын үеэр Ерөнхийлөгч Ким түүнд шинэ зэвсгийн үзэсгэлэнгээ танилцуулсан юм. Мөн Шойгу Хойд Солонгосын удирдагчид Ерөнхийлөгч Путины илгээсэн зэвсэгт хүчний хамтын ажиллагааг сайжруулах тухай захидлыг дамжуулан өгсөн.  

Нью Йорк Таймс сонины мэдээлснээр хоёр улсын удирдагчдын уулзалт Оросын зүүн эрэгт орших Владивосток хотод болж магадгүй байна.

Эх сурвалж: ВВС