Орон нутгийн эрх баригчид Японы аялал жуулчлалын өсөлтөөс үүдэлтэй түгжрэлийг бууруулахыг хичээж байгаа тул зуны авиралтын улирал эхлэхэд Фүжи уул руу хамгийн алдартай маршрутаар нь өгсөх  хүмүүсээс 2000 ¥ /ойролцоогоор 45000 төгрөг/ хураана.

Хөтчүүд хэт олон хүн ирж, уулын ариун цэврийн байгууламжид өмнө нь байгаагүй ачаалал үүсгэж байна гэжээ.  

Уулыг тойрох  хоёр мужийн нэг нь болох Яманаши дахь Ёшидагийн замаар оргил руу өгсөх явган аялагчдаас долдугаар сараас эхлэн төлбөр авна. Өдөр бүр 4000 хүнээр хязгаарлагдаж, 16:00-03:00 цагийн хооронд нэвтрэхийг хориглоно гэж Киодо агентлаг мэдээлэв.

Өнөөг хүртэл уулчдаас 1000 ¥-ийн сайн дурын хандив өгөхийг л хүсдэг байжээ.

Явган аялагчид хөрш зэргэлдээх Шизүока мужийн гурван өөр маршрутыг үнэгүй ашиглах боломж хэвээр байна. Харин Ёшидагийн зам нь Токиогоос аялж буй уулчдад тохиромжтой, 60 орчим хувь нь уг замыг ашигладаг тул дээрх шийдвэр нийт тоог хязгаарлана гэдэгт албаныхан итгэлтэй байна. Таван үе шатнаас оргил руу гарахад дунджаар 5-6 цаг зарцуулдаг ч нөхцөл байдал, авирах чадвараас шалтгаалж арван цаг зарцуулах нь ч бий.

Японы Байгаль орчны яамны мэдээлснээр өнгөрсөн жилийн гурван сарын авиралтын улиралд 220 мянган жуулчин Фүжигийн 10 үе шатын найм дахийг давсан нь цар тахлын өмнөх тоотой ойролцоо байна.

Нээлтийн цагийн хязгаарлалт нь нар мандахыг харах сонирхолтой хүмүүс оргил дээр цагтаа гарах зорилготойгоор тав дахь шатнаас авиралтаа эхлүүлэхийн тулд оройтож ирэхээс сэргийлнэ гэж найдаж байна.

Японы хэвлэл мэдээллийн хэрэгслээр тоног төхөөрөмж муутай уулчдын нэг хэсэг нь ууланд зам зуураа унтаж хонодог тухай мэдээлжээ. Зарим нь өөрсдийгөө гэмтээж эсвэл өндрийн өвчнөөр өвчилдөг гэжээ.

Эх сурвалж: The Guardian