Гренландын нийслэл Нууке хотноо Арктикийн зөвлөлийн чуулган болж өнгөрлөө. Энэ зөвлөлд найман улс орон ордог бөгөөд тэдгээрийн дотор АНУ, ОХУ, Канад, Норвеги, Дани, Швейцарь, Финлянд, Исланд орж байна. Энэ уулзалтаар эдгээр орны гадаад хэргийн сайд нар уулзсан бөгөөд агаарын болон далайн эрэл хайгуул аврах ажиллагааны тухай гэрээнд гарын үсэг зурлаа. Гэхдээ үүнээс илүү чухал зүйл гэвэл Хятад, Энэтхэг, Өмнөд Солонгосын энэ зөвлөлд ажиглагчийн байр сууринаас орох гэсэн хүсэлтэнд хариу өгчээ.

Сүүлийн үед дэлхийг хамраад байгаа дулааралд сайн тал байгааг талууд онцолжээ. Мөс хайлж байгаа нь далайн тээвэрлэлтийн боломжийг нэмэгдүүлж, загас агнуур болон аялал жуулчлалыг хөгжүүлэх өргөн хүрээтэй боломжийг нээж өгч байгаа юм.

Гэхдээ үүнээс чухал зүйл бол мөс хайлснаар Арктикийн ихээхэн хэмжээний эрдэс баялгийг ашиглах боломжийг нээж байгаа явдал юм. Америк болон норвегийн геологичдын мэдээллээр Арктикт нийт дэлхийн газрын тос болон шатдаг хийн 25-25 хувь нь байдаг. Мөн үүн дээр үнэт металл болон нүүрсийг нэмэх хэрэгтэй болно. Энэ бүхэн “мөсөн бялууг” маш амттай болгож байгаа боловч Арктикийн зөвлөлийнхөн түүнийгээ хуваах гэж нэг их яарахгүй байна. Хэрэв хувааж эхлэх юм бол ашиг сонирхлын зөрчил үүсч болзошгүй хэмээн эмээж байгаа бололтой. Үүний оронд онцын зөрчил үүсгэхгүй асуудлаар хэлэлцжээ.

Нууке хотноо чухал алхам хийсний нэг бол Арктикаас хол байрлалтай өмнөд зүгт орших орнуудад тодорхой хэмжээний хариу барьсан явдал юм. Хятад, Энэтхэг, Өмнөд Солонгос мэт орнууд Арктикийн зөвлөлд ажиглагчийн байр суурь эзлэхийг санаархаж байгаа юм. Гэтэл нэгэнт ажиглагч болох юм бол цаашлаад улам бүр ихийг шаардах болно хэмээн зөвлөлийн гишүүд үзэж байна. Нэгэнт эрхийг нь бататгаж өгөх юм бол Арктикийг Антарктидын нэгэн адил нийт хүн төрөлхтөнийх гэж зарлахад хүрнэ гэж эмээж байгаа юм.     
    
Т.Бүрэн