Сүүлийн жилүүдэд төвлөрсөн хот суурин газрын ногоон орчны тохижилтын талаар ярьж байгаа ч иргэд өөрсдөөсөө шалтгаалах зүйл хийлгүй байсаар тоос, шороо, хог, тортогондоо дарагдсан бүүдгэр саарал гудамж талбай хаа сайгүй үргэлжлэх нь энгийн зүйл боллоо. Бид хөгжил дэвшил ярьж хоосон цээжээ дэлдэхээс илүүтэйгээр өөрсдийн оршин суугаа орчноо зүлэгжүүлэн, ногоон байгууламж бий болгох нь улс орноо хөгжил дэвшилд хөтөлж байгаа шинэ хэлбэр юм.

Тиймээс "Органик Монгол хөтөлбөрийн зохион байгуулагчид болон дэмжигчдийн зүгээс байгаль орчноо хамгаалахад хувь нэмэрээ оруулахыг хүссэн хүн бүрийг 9 cap хүртэл "ИРГЭН БҮР 1 М.КВ ЗҮЛЭГЖҮҮЛЭЛТ" аян зарласан нь цагаа олсон ажил болжээ.

Монгол улсын хөдөлмөрийн насны иргэн бүр өөрийн амьдран суугаа газрын эргэн тойрондоо 1 м.кв талбайд, 1 м.кв-ын талбайн тарилтын зардал 8500 зарцуулан олон наст ногоон зүлэг тарьж, байнга усалж тордож ургуулж чадвал Монгол орны хоёр сая хавтгай дөрвөлжин метр квадрат талбай богинохон хугацаанд ногоон дэвсэг болж бид байгаль орчин, тэр дундаа өнөөгийн бидэнд нүүрлээд байгаа цөлжилтийн эсрэг үнэлж баршгүй их хувь нэмэр оруулах юм. Эх орныхоо ногоон хөгжлийн төлөө зарцуулах 8500 үр хүүхдийн тань эрүүл мэнд болон ирээдүйд үнэтэй хөрөнгө оруулалт болох нь дамжиггүй.

Иргэдийн амьдрах орчин ая тухтай эрүүл саруул байхад хотын ногоон байгууламжийн үүрэг маш чухал. Тоос шороог багасгахаас гадна дуу чимээг бууруулна, агаар дахь хорт бодисыг цэвэрлэнэ, хотын гудамжинд таатай өнгө үзэмжийг нэмнэ гээд дурдвал нэлээн ач холбогдолтой. Тиймээс уг аянд нэгдсэн иргэдийг тус хөтөлбөрийн нэвтрүүлгээр дамжуулан бүх нийтэд сурталчилан таниулах гэнэ.

Мөн 88117309, 55253533 утсаар холбоо барих боломжтой. Ингэснээр бид богино хугацаанд бага зардлаар ногоон орчныг бүрдүүлж чадна. Үүнд ганц байгууллага, иргэд та бүхний чин сэтгэл, санаачилга, идэвх оролцоо л хэрэгтэй.