1279 оны гуравдугаар сарын 19. Сүн гүрэн Юань гүрний эсрэг сүүлчийн тулаанаа хийв

Одоогоос 740 жилийн өмнөх энэ өдөр Хятадын Сүн гүрэн Монголын Юань гүрэнг сөрж зогссон сүүлийн тулаанаа хийжээ. “Ямены тулаан” гэж алдаршсан уг усан тулаан нь одоогийн Хятад улсын Гуандон аймгийн, Жианмен хот, Шинхуй гэх газрын ойролцоо болсон байна. Сүн гүрэн 200 000 гаруй цэрэг 1000 давсан хөлөг онгоц бүхий их хүчээр тулалдсан ч Юань гүрний 20 000 орчим цэрэг 50 гаруй хөлөг онгоцтой усан цэргийн флотод ялагджээ. 100 000 гаруй Сүн цэрэг амиа алдсан тулааны үр дүнд Сүн гүрэн уналтад орсон юм.

1932 оны гуравдугаар сарын 19. Sydney Harbour гүүр ашиглалтад оров

Австрали улсын Шинэ Өмнөд Үэльс муж дахь Сидней хотын боомт гүүр энэ өдөр нээлтээ хийн ашиглалтад оржээ. Тасманы тэнгисийн Порт Жексон буланд байрладаг уг гүүрийг 1923 оны долдугаар сарын 28-нд барьж эхэлсэн юм. Есөн жилийн турш барьсан гүүр 1,1 км урттай аж. Гүүрийн загварыг Британий “Dorman Long and Co” компани гаргаж, Шинэ Өмнөд Үэльс мужийн инженер Жон Брэдфилд барилгын ажлыг удирдан явуулсан юм.

2003 оны гуравдугаар сарын 19. Иракийн дайн эхлэв

Америк, Британийн эвслийн хүчин Иракийн дайн эхэлснийг мэдэгджээ. Иракийн нийслэл Багдад хотод болсон дэлбэрэлтийн дараагаар АНУ-ын Ерөнхийлөгч Жорж В.Буш “Яг энэ цаг мөчид, Америк болон эвслийн хүчин цэргийн үйл ажиллагааныхаа эхний шатанд Иракийг зэвсэггүйжүүлж, хүмүүсийг чөлөөлж, дэлхийг аюулаас хамгаална” хэмээн олон нийтэд зарласан юм. Энэ үед Иракийн дарангуйлагч Саддам Хуссейн нийтээр нь устгах зэвсэг бүтээж байсэн гэж зарим эх сурвалж үздэг байна. Харин эвслийн хүчин түүнийг унагаж, Иракийн гол хотуудыг хэсэг хугацаанд хяналтдаа авчээ. Үүний дараа мөн оны тавдугаар сарын 1-нд Ерөнхийлөгч Буш гол байлдааны ажиллагаа дууссаныг мэдэгдсэн юм.

Эх сурвалж: Onthisday.com