Нийслэл хотноо өнгөрсөн долоо хоногт болсон Монгол, Оросын хувь нийлүүлсэн нийгэмлэгийн Ерөнхий хорооны ээлжит хуралдааны үеэр хэлэлцсэн гол асуудлын нэг нь “Улаанбаатар төмөр зам”-ын даргыг жинхлэх, эсэх тухай байжээ.

Хуралдаанд ОХУ-ын талаас тус улсын Тээврийн дэд сайд А.С.Цыденов, “Оросын төмөр зам” нийгэмлэгийн дарга В.Н.Морозов нар оролцсон аж.

“Улаанбаатар төмөр зам”-ын даргын үүрэг гүйцэтгэгч Г.Сэрээнэндоржийн ажлын тайлан, хөтөлбөрийг сонсож, сайшаасан оросууд түүнийг жинхлэх нь зүйтэй гэсэн байна. Харин манайхан (Зам, тээврийн яамны газрын дарга Ё.Манлайбаяр, УБТЗ-ын Үйлдвэрчний эвлэлийн хорооны дарга Х.Эрдэнээ) оросуудын саналыг хүлээж аваагүй аж.

Тэд он дуустал ажлыг нь харъя, 2014 оны хоёрдугаар сар хүртэл үүрэг гүйцэтгэгчээр нь үлдээе гэсэн санал гаргаж, оросуудаар зөвшөөрүүлжээ.

Бидэнд олдсон мэдээллээр манайхны саналын цаана нэлээд явдал байсан гэх. Хамтарсан нийгэмлэгийн Ерөнхий хорооны Монголын талын гишүүдэд УИХ, Засгийн газрын зүгээс нөлөөлөхийг оролдсон тухай төмөр замчид ярьж байна. Тэдэнд АН-ын “Шонхор” фракцынхан УИХ-ын гишүүн асан, УИХ-ын даргын зөвлөх Д.Одхүүг санал болгож, “Улаанбаатар төмөр зам”-ын даргад зүтгүүлэхийг ятгасан юм байх.

Тиймээс манайхан оросуудын саналыг хүлээж авалгүй, даргын асуудлыг Ерөнхий хорооны дараагийн хуралдаан хүртэл хойшлуулжээ.

Д.Дагва